“Manchester Yunayted” Londondagi o‘yinda “Liverpul”ning natijasini takrorladi va safardagi g‘alabalar soni bo‘yicha rekord qayd etdi

“Manchester Yunayted” APLning 17-tur doirasidagi qoldirilgan o‘yinida “Brentford”ni 3:1 hisobida mag‘lub etdi.

Shu tariqa mankunianliklar Premyer Liga tarixidagi 60 ta stadionning barchasida kamida bittadan gol urgan ikkinchi klubga aylandi. Bungacha “Liverpul” ham shunday natijaga erishgandi.

Shuningdek, “qizil iblislar” liga doirasida birinchi bo‘lib, safardagi 300-g‘alabasiga erishdi.

Ayni damda “Chelsi” mehmondagi o‘yinlarda 259, “Arsenal” 246, “Liverpul” 239, “Manchester Siti” esa 188 ta g‘alabaga erishgan.

“Manchester Yunayted” Angliya chempionatida 21 ta o‘yin o‘tkazib, 35 ochko bilan musobaqa jadvalida 7-o‘rinda bormoqda. Ralf Rangnik shogirdlari navbatdagi o‘yinini 8-fevral kuni “Byornli”ga qarshi o‘tkazadi.