“Kelgusida har bir tumanda bank filiallari bo‘lishi tizimidan qochmoqchimiz” — Markaziy bank raisi

“Xalq banki” 2022-yilda 40 ga yaqin filiallarini yopib, ularning o‘rniga zamonaviy bank xizmatlari ofislarini tashkil qilishni rejalashtirgan. Bu haqda Markaziy bank raisi Mamarizo Nurmurodov ishtirokida o‘tkazilgan matbuot anjumanida aytildi, deya xabar bermoqda “Daryo” muxbiri.

“Biz banklar xarajatlarini qisqartirish borasida hamma tijorat banklarimizga Markaziy bank sifatida o‘zimizning ko‘rsatma va tavsiyalarimizni berganmiz. Kelgusida har bir tumanda, yirik-yirik shaharlarda bank filiallari bo‘lishi tizimidan qochmoqchimiz. Bizda “Aloqa bank” to‘liq yagona tizimga o‘tdi. Bu degani “Aloqa bank”ning joydagi bo‘linmalari bank xizmatlari ofisi markazlash funksiyasini bildiradi”, — deydi u.

Markaziy bank raisining so‘zlariga ko‘ra, bu orqali bankdan qo‘shimcha xarajatlar kamaytiriladi.

“Ushbu vazifa barcha tijorat banklari oldiga qo‘yilgan va bu jarayon hozir keng tus olib amalga oshirilmoqda. Yaqinda “Xalq banki” raisi bilan gaplashganimizda bu yilning o‘zida 40 ga yaqin filiallarini yopib, ularning o‘rniga zamonaviy bank xizmatlari ofislarini tashkil qilishni rejalashtirgan”, — deya qo‘shimcha qiladi Mamarizo Nurmurodov.