O‘zbekiston futbol assotsiatsiya rahbariyati 18-yanvar kuni Italiyaning “Roma” klubi vakili Karlos Perez bilan uchrashuv o‘tkazdi, deb yozmoqda tashkilot matbuot xizmati.
Uchrashuvda O‘FA vakillari O‘zbekistonda “Roma” klubi akademiyasini tashkil etish imkoniyatlarini o‘rganish borasida fikr bildirgan O‘zbekistonlik iqtidorli futbolchilar hamda murabbiylarni Italiyada malaka oshirish va tajriba almashishini yo‘lga qo‘yish masalasi muhokama etildi. Yevropada mavqeyi yuqori hisoblangan “Roma” klubining marketing tizimini ham o‘rganib chiqib, mamlakatda tatbiq etish taklifi ilgari surilgan.
Bundan tashqari, Eldor Shomurodov kabi O‘zbekistonning yetakchi futbolchilarining xorijiy klublardagi faoliyatiga oid maxsus filmlar tasvirga olish kerakligi, bu yosh futbolchilarning motivatsiyasini oshirish, o‘z ustida ishlash, professionallikka intilish, irodali bo‘lib yetishishiga turtki bo‘lishi mumkinligini ta’kidlandi.
Shuningdek, mazkur uchrashuvda sport tadbirlarini tashkil etish, menejment, marketing kabi bir qator yo‘nalishlarda dunyoning yetakchi kompaniyalaridan hisoblangan International Management Group vakillari ham ishtirok etdi.
Eslatib o‘tamiz, “Roma” 2021-yilning yozida 17,5 million yevro evaziga “Jenoa”dan Eldor Shomurodovni sotib olgan. Eldor 2021/22-yilgi mavsumda “Roma” safida barcha musobaqalarda 26 o‘yin o‘tkazib, 3 ta gol va 5 ta golli uzatmani amalga oshirdi.
Izoh (0)