Qozog‘iston milliy xavfsizlik qo‘mitasi sobiq rahbari Karim Masimov davlatga xiyonatda ayblanib hibsga olindi

Qozog‘iston milliy xavfsizlik qo‘mitasi sobiq rahbari Karim Masimov hibsga olindi, u davlatga xiyonat qilganlikda aylanmoqda. Bu haqda Qozog‘iston MXQ matbuot xizmatiga tayanib “Zakon.kz” xabar berdi.

Qo‘mita matbuot xizmati xabariga ko‘ra, Masimov Qozog‘iston Jinoyat kodeksining 175-moddasi 1-qismi bilan davlatga xiyonatda gumonlanmoqda va 6-yanvarda mazkur holat bo‘yicha sudga qadar tergov jarayoni boshlangan. Shuningdek, shu kunning o‘zida Masimov bilan birga boshqa gumonlanuvchilar ham hibsga olinib, vaqtincha ushlab turish izolyatorida saqlanmoqda, deya qo‘shimcha qilgan Qozog‘iston MXQ.

Tergov va surishtiruvga aloqador boshqa maxfiy axborotlar oshkor etilmaydi, deya bayonotga yakun yasagan qo‘mita matbuot xizmati.

6-yanvarda Qozog‘iston prezidenti Qosim-Jo‘mart To‘qayev Masimovni MXQ rahbari lavozimida ozod qilgan, shuningdek, qo‘mita raisining o‘rinbosari Anuar Sadikulov ham ishdan bo‘shatilgandi. Masimov 6-yanvarda bo‘lib o‘tgan Xavfsizlik kengashining yig‘ilishida shaxsan ishtirok etgan.

Avval Qozog‘iston birinchi prezidenti Nursulton Nazarboyevning sobiq maslahatchisi Yermuhamet Yertisbayev mamlakatdagi tartibsizliklarni boshlagan kimsalar To‘qayevni hokimiyatdan chetlatishga uringani haqida gapirgandi. U bunday davlat to‘ntarishini rejalashtirish va amalga oshirish yuqori lavozimlardagi “sotqinlar”siz qilib bo‘lmasligini ta’kidlagan.

56 yoshli Masimov 2016-yil sentabr oyida MXQ rahbarligiga tayinlangan. U turli yillarda bosh vazir, prezident administratsiyasi rahbari va Qozog‘iston prezidentining yordamchisi kabi lavozimlarda ishlagan.

Masimov 2007-yildan 2012-yilgacha hamda 2014-yil aprelidan 2015-yil apreligacha bosh vazir, keyin prezidentlik saylovlaridan so‘ng qayta hukumat rahbarligiga saylanib 2016-yil sentabrgacha mazkur lavozimda ishladi. Umumiy hisoblaganda Masimov Qozog‘iston 7 yil davomida bosh vazir sifatida faoliyat olib borgan.

Avvalroq Qozog‘iston IIV 4000 nafargacha terrorchi hibsga olinganini ma’lum qilgani, Qozog‘iston yong‘in o‘chirish xizmati xodimlari butun mamlakat bo‘ylab olov ichida qolgan 143 nafar odamni evakuatsiya qilgani haqida xabarlar berilgan.