“Tuxum eksporti cheklangani — vaqtinchalik chora”. Iqtisodiyot vazirligi tuxum eksport qilishga cheklov qo‘yilganini tasdiqladi

O‘zbekistonda tuxum eksporti uchun vaqtinchalik cheklov joriy etilgani haqidagi xabarlar rost. Buni Iqtisodiy taraqqiyot va kambag‘allikni qisqartirish vazirligi tasdiqladi.

Qayd etilishicha, pandemiya sharoitida ishlab chiqarish, iqlim va logistika bilan bog‘liq sabablar ta’sirida jahonda asosiy oziq-ovqat mahsulotlari narxlarida sezilarli o‘sish kuzatilmoqda. Bunga javoban dunyoning ko‘plab mamlakatlari tomonidan ichki bozorda oziq-ovqat xavfsizligi va narxlar barqarorligini ta’minlash maqsadida ayrim mahsulotlar eksportini cheklash bo‘yicha choralar ko‘rilmoqda.

2021-yilning sentabr—dekabr oylarida respublika bo‘yicha tuxum narxi 19,6 foizga, ayrim hududlarda esa 20-22 foizgacha qimmatlashgan. Tuxum narxining oshishiga qish oylarida isitish xarajatlari oshishi va parrandachilik xo‘jaliklarida kasalliklarning avj olishi, tuxum berishga moslashgan tovuqlarning mavsumiy yangilanishi, ozuqa mahsulotlarining qimmatlashishi hamda kuz mavsumidan boshlab ushbu mahsulotga talabning ortib borishi (boshqa oylarga nisbatan 20-30 foizga oshadi) ta’sir ko‘rsatgan. Yilning qish mavsumida ushbu mahsulot narxiga qo‘shimcha bosim yuzaga kela boshlaydi.

Bundan tashqari, parrandachilik xo‘jaliklarida ozuqa bazasining yetishmasligi bilan bog‘liq muammolar sababli ko‘plab xo‘jaliklardagi parrandalar soni umumiy hisobda 1 milliondan ortiq miqdorga kamaygan.

Global pandemiyaning davom etayotganini, asosiy oziq-ovqat mahsulotlari narxlarining aholi xarid qobiliyatiga ta’sirining yuqoriligi, shuningdek, ichki bozorda narxlar barqarorligini ta’minlashning muhimligini inobatga olgan holda, tuxum eksportiga nisbatan kiritilgan cheklov vaqtinchalik chora hisoblanadi.

Eslatib o‘tamiz, bloger Bahodir Ahmedov 5-yanvar kuni Telegram’dagi kanalida “Tuxumga taqiq: bosh vazir yig‘ilish bayonnomasi, asl taklif berganlar ma’lum” sarlavhali post joylashtirgan. Unda bir qator vazirliklar bojxonadan 1-aprelgacha tuxum o‘tkazmaslik taklifi bilan chiqqani, buning boshida Veterinariya qo‘mitasi turgani aytilayotgani keltirilgan.

Veterinariya va chorvachilikni rivojlantirish davlat qo‘mitasi tuxum eksportiga taqiq qo‘yilgani haqidagi xabarga raddiya berdi. Unda aytilishicha, “tuxum eksporti bo‘yicha tadbirkorlarga og‘zaki yoki yozma taqiq qo‘yilmagan. Shuningdek, tadbirkorlar tuxum import qiluvchi mamlakatlarning me’yor va tartiblariga muvofiq eksport qilishlari uchun qo‘mita tomonidan cheklov o‘rnatilmagan”.