Toshkentda mast piyoda avtobus bosib ketishi oqibatida halok bo‘ldi

Toshkent shahri Olmazor tumanida 6-yanvar kuni yo‘lovchi avtobusi piyodani bosib ketdi. Bu haqda “Toshshahartransxizmat” AJ xabar qildi.

Ma’lum qilinishicha, yo‘l-transport hodisasi 6-yanvar kuni soat 19:50 atrofida Usta Shirin ko‘chasida sodir bo‘lgan. Isuzu rusumli avtobus haydovchisi (1964-yilda tug‘ilgan, ish staji — 35 yil) 43-sonli yo‘nalishda harakatlanib borayotib, Jomiy qurilish bozori oldidagi svetoforda to‘xtash uchun sekinlashgan. Shu vaqt yo‘l qatnov qismining birinchi bo‘lagida ketayotgan piyoda to‘satdan muvozanatni yo‘qotib, avtobus tomonga yiqilgan.

Oqibatda fuqaro voqea joyida halok bo‘lgan. Dastlabki xulosaga ko‘ra, u mast bo‘lgan.

Hozirda YTH bo‘yicha dastlabki tergov ishlari olib borilmoqda.