Farg‘onada ichki ishlar idoralari tomonidan dronlardan foydalanish amaliyoti to‘xtab qolgani yo‘q, faqat ma’lum muddat tanaffus bo‘ldi. Bu haqda jurnalist va blogerlar bilan uchrashuv davomida Farg‘ona viloyat IIB boshlig‘i, polkovnik Doniyor Toshxo‘jayev ma’lum qildi, deya xabar beradi “Daryo” muxbiri Azizbek Abduvaliyev.
“Daryo” muxbirining “Farg‘onada ichki ishlar tizimida dronlardan foydalanish boshlangani haqidagi xabarlar ancha shov-shuv bo‘lgandi, biroq keyinchalik bu haqda yangiliklarni eshitmay qo‘ydik” degan savoliga javoban Toshxo‘jayev quyidagilarni bildirdi:
“Chindan ham yil boshida dronlardan sinov tariqasida foydalanishni boshlayapmiz deb e’lon qilgandik. Vazirlik ularni ishlatish bo‘yicha yangi instruksiyalarni tayyorlab, boshqa tegishli idoralar bilan kelishayotgan payt ma’lum muddat to‘xtab qoldi. Avgustdan yana ruxsat berildi. Bizda bu uslub tibbiy niqob taqish tartibiga rioya etish masalasida yaxshi samara berdi. Bayram kunlari tinchlik va xavfsizlikni ta’minlashda ham juda qo‘l keldi. Ulardan yo‘llarda harakat xavfsizligini ta’minlashda ham keng foydalanishni rejalashtirganmiz. Shunday dastur qilyapmiz: masalan, 45 daqiqada uchib-borib keladigan yo‘nalish tanlanadi. Kamerasini o‘rnatib beramiz, dron o‘zi avtomatik ko‘tarib yuraveradi. Yo‘llarda qoidabuzarliklarni qayd etib boraveradi — kamar taqmaslikmi, qizil chiroqqa o‘tishmi, chiziqni bosishmi. Hozir shuni ustida ishlayapmiz”, — dedi Doniyor Toshxo‘jayev.
IIB boshlig‘ining qayd etishicha, kamar bo‘yicha sinov tariqasidagi jarayonlar allaqachon boshlangan: 15-dekabrdan Farg‘onada shu asosdagi bayonnomalar chiqa boshlagan va egalariga yuborilgan.
Izoh (0)