Serial efirga uzatilganda muxlislar shu darajada ishtiyoq bilan tomosha qilganidan qishloqlarda sigirlar ham yo‘qolgani, hatto devorlarda yozib qoldirilgan “Rahmat, senga Esmeralda!” degan tashakkurnomalar ham quloqqa chalingan edi. Eng qizig‘i, film namoyishidan so‘ng bosh qahramon − Esmeraldaga ovoz bergan aktrisa Shohida Uzoqova bilan radio orqali olib borilgan intervyuni eshitgan sodda ayollar “Esmeralda Toshkentga kelganmish” deb o‘ylagan ekan.
Mana shunday shov-shuvlarga sabab bo‘lgan “Esmeralda” seriali qahramonlari 23 yil ichida qanchalik o‘zgardi?
Serial voqealari boshidanoq qarama-qarshilikka boy. Kambag‘al oilada o‘g‘il va boy oilada qiz tug‘iladi. Taqdir taqazosi bilan tug‘iliboq yetim qolgan bola boy oilaga, o‘lik deb gumon qilingan qiz doya Dominganing qo‘lida qoladi. Ammo qizaloqning tirikligi va ko‘zi ojiz ekanligini bilgan Dominga endi hech narsa qila olmasdi. Oradan yillar o‘tib ulg‘aygan chaqaloqlar – Esmeralda va Xose Armando uchrashib qoladi va bir-biriga ko‘ngil qo‘yadi. Ammo ularning muhabbati ortidan mashaqqatli sinovlar kutib turadi. Ularning turmush qurishiga qarshilik ko‘rsatgan yigitning qarindoshlari va Esmeraldaga uylanish niyatida bo‘lgan Lusio Malaverning fitnalari tufayli ikki yosh ayriliq azobiga duchor bo‘ladi.
Esmeralda
Letisiya Kalderon
Serialda bosh qahramon – Esmeralda rolini ijro etgan Letisiya Kalderon 1968-yil 15-iyulda Mexikoda tug‘ilgan. Aktrisaning uch nafar akasi bor: Alexandro, Mario va Migel. Akasi Alexandro ham singlisi kabi bir necha filmlarda suratga tushgan. Letisiya bolaligida turli shaharlarda yashagan va 13 yoshga to‘lganidan so‘ng Mexikoga qaytib kelgan. U 1982-yil debyut rolini ijro etdi va keyinchalik 37 ta film va seriallarda suratga tushdi. Aktrisaning nomzodligi 7 xil mukofotga 21 marotaba qo‘yilgan va undan 15 marta g‘alabani qo‘lga kiritgan. Shuningdek, “Eng yaxshi aktrisa” unvoniga ham sazovor bo‘lgan.
Ma’lumotlarga ko‘ra, Letisiya “Esmeralda” serialidagi ko‘r qiz obraziga shu qadar kirishib ketganki, suratga olish ishlari yakunlangandan keyin ham Esmeralda rolidan chiqib keta olmagan, xuddi u kabi ko‘rga o‘xshab yurishga o‘rganib qolgan.
Xose Armando
Fernando Kolunga
1966-yil 3-martda Mexiko shahrida Fernando va Margarita Olivares oilasida tug‘ilgan yagona farzand. Ma’lumoti bo‘yicha muhandis, lekin hech qachon kasbi bo‘yicha ishlamagan. U teatr tomoshalari uchun e’lon qilingan kastingda qatnashgan va kutilmaganda qabul qilingan. Fernando aktyorlik faoliyatini teatrlarda boshlagan va hanuzgacha u yerda rol ijro etadi.
Don Rodolfo Penarreal
Enrike Lisalde
Enrike 1937-yil 9-yanvar kuni Meksikada tavallud topgan. U kino, TV va teatr aktyori bo‘lib, uning ijodiy faoliyati 1960−2000-yilgacha davom etdi. O‘tgan vaqt mobaynida Enrike o‘nlab film, serial va spektakllarda rol ijro etdi. Aktyor 2013-yil 3-iyun kuni 76 yoshida vafot etgan.
Fatima Linares
Laura Sapata
Laura Sapata 1956-yil 30-iyul kuni bokschi Gilermo Sapata oilasida tug‘ilgan. Bolaligida otasi vafot etgandan so‘ng onasi Iolanda Miranda qayta turmushga chiqadi. Ammo o‘gay ota qizaloqni yaxshi qabul qilmaydi, shuning uchun u buvisi Evi manxe qo‘lida tarbiya topadi. Aktrisaning o‘zidan keyingi 4 singlisi ham ijodkor – yozuvchi va musiqa yo‘lini tanladi. U yoshligidan san’at, musiqa va rol ijro etishga qiziqar edi. Mamlakatdagi Andres Soler nomidagi madaniyat va san’at oliygohida aktyorlik bo‘limida tahsil oldi. Ammo buvisi dastlab uning tanlagan kasbi va hukmronlik qiladigan muhitdan xavotir olib, nabirasining xohishlariga qarshi chiqdi. Lekin aktrisa buning aksini isbotladi, u mahortali aktrisa bo‘libgina qolmay, buvisidan qolgan barcha fazilatlarni ham saqlab qoldi.
Lusio Malaver
Salvador Pineda
Salavdor Pineda 1952-yil 12-fevralda Meksikada diplomatlar oilasida dunyoga keldi. Onasi Gloriya aktrisa bo‘lishni juda ham orzu qilgan, keyinchalik o‘zini oilasi va farzandlariga bag‘ishladi. Aktyor o‘z faoliyatini teatrda rol ijro etishdan boshladi. Shundan so‘ng birin-ketin film va seriallarda suratga tushdi. Aktyor dastlab aktrisa Alma Delfina bilan rasman nikohdan o‘tgan. Keyinchalik “Sendan boshqa hech kim”seriali bosh qahramoni Lusiya Mendes bilan ishqiy munosabat o‘rnatgan. Eng qizig‘i, serial voqealari ham shunday tarzda kechadi, afsuski, aktyor hayotda ham, serialda ham raqibiga yutqazib qo‘ygan. Shundan so‘ng venesuelalik aktrisa Mayra Alexandra bilan turmush qurdi va uzoq vaqtga bormay ajrashishga qaror qildi. Hozirda aktyor yolg‘iz yashaydi.
Melesio
Iganasio Lopes Tarzo
Aktyor 1925-yil 15-yanvarda Meksikada tug‘ilgan. U 1973-yil “Oq atirgul” filmidagi roli uchun “Eng yaxshi aktyor”, 2007-yil “Hayot yutuqlari” unvoniga sazovor bo‘ldi. Mahoratli aktyor 95 yoshni qarshiladi va uning ijodiy faoliyati kinoda 50 dan ortiq va spektakllardagi bir qancha rollarni o‘z ichiga oladi.
“Esmeralda” serialidagi tentak Meliso obrazi uning serqirra aktyor ekanligidan darak. Sababi u boshqa o‘nlab filmlarda jiddiy rollarda namoyon bo‘lgan. Aynan tentak Meliso rolidan keyin unga taqlid qiluvchilar soni ham ko‘paygan.
Blanka De Velasco
Rakel Morel
Rakel Morel 1959-yil 4-fevralda Moreliyada tug‘ilgan. 1985-yil kino san’atiga qadam qo‘ydi. Aktrisa ijodi davomida bir qancha seriallarda suratga tushdi va jahon yulduzi darajasigacaha ko‘tarildi. 2013-yilda Meksikada eng yaxshi aktyor va aktrisalar reytingi tuzildi va unga ko‘ra aktrisa 100 talik reytingning 77-qatoridan joy olgan.
Gratsiyela Penarreal
Nora Salinas
Nora Salinas 1976-yil 7-iyunda Meksikada tug‘ilgan. U dastlab modellik bilan shug‘ullangan, keyinchalik aktrisalik faoliyatini boshlagan. Salinas ilk bora “Esmerelda” serialidagi tannoz Gratsiyela obrazini ijro etdi. U kambag‘al Adrianga muhabbat qo‘ygan, ammo zodagon onasi Fatima nazorati ostida azob chekishga majbur, doimo muhabbatga moyil Gratsiyela qahramonini mahorat bilan ijro etganligi uchun xalqaro miqyosda shuhrat qozondi.
Adrian Lusero
Alexandro Ruis
Aktyor va xonanda Alexandro 1967-yil 9-iyunda Meksikada tug‘ilgan. U ilk bora 8 yoshida “Qotil yolg‘iz emas” filmida Xulioning bolaligini ijro etgan. Keyinchalik u iqtisodiyot yo‘nalishida ta’lim oladi va uni tark etib, aktyorlik faoliyatini boshlaydi. U ijodi davomida 60 dan ortiq rol ijro etdi.
Izoh (0)