Kobulda “Tolibon” jangarilari norozilik namoyishiga chiqqan ayollarni tarqatish uchun havoga o‘t ochdi. Bu haqda Afg‘onistonning “Ashvaka” agentligi Twitter’da xabar berdi. Hodisa Italiyaning Kobuldagi Emergency gumanitar tashkiloti shifoxonasi yaqinida sodir bo‘lgan. Qurbonlar va halok bo‘lganlar haqida hozircha ma’lumot berilmagan.
Bundan avval TOLOnews telekanali Afg‘oniston poytaxtida bir guruh ayollar o‘z huquqlarining hurmat qilinishi va turmush sharoitining yaxshilanishi talabi bilan norozilik namoyishiga chiqqani haqida xabar bergandi.
“Biz — och odamlarning ovozimiz”, “Ayollar jonlandi, biz diskriminatsiyadan nafratlanamiz”, deya telekanal norozi ayollarning shiorlarini keltirib o‘tgan. Keng tarqalgan videoyozuvlardan namoyishda bir necha o‘nlab ayollar qatnashganini ko‘rish mumkin.
Avvalroq “Tolibon” haydovchilarga hijobsiz ayollarni mashinasiga mindirishni taqiqlagan edi. Shuningdek, Afg‘onistonning G‘azni viloyatida “Tolibon” hukumatining mulozimlari shifokorlarga erkaklar hamrohligisiz qabuliga kelgan ayollarni davolashni man etgan.
Avgust oyida “Tolibon” hokimiyatga kelganidan so‘ng ayollarga o‘qish va ishlash uchun ruxsat berilishi, ularning boshqa huquqlari buzilmasligi aytilgan. Biroq “Tolibon” hukumatining harakatlari bayonotlariga tobora zid kelmoqda, deb yozadi Etilaatroz nashri. “Tolibon” hukmronligining 4 oyi davomida ayollarning deyarli barcha huquq va erkinliklari cheklandi: ularga ommaviy axborot vositalarida, davlat tuzilmalarida ishlash, o‘z biznesiga ega bo‘lish, sport bilan shug‘ullanish, filmlarda rol o‘ynash, universitetlarda o‘qish taqiqlandi. Afg‘onistonning aksariyat viloyatlarida o‘rta va katta sinfdagi qizlar maktablari yopildi. Sentabr oyida “Tolibon” Ayollar masalalari bo‘yicha vazirlikni tugatgan.
Shu bilan birga, dekabr oyida boshida “Tolibon” harakatining oliy rahbari Haybatulla Ohunzoda ayollar huquqlari bo‘yicha maxsus farmon chiqargandi. Farmonda qayd etilishicha, voyaga yetgan ayolni turmushga uzatishda uning roziligi talab qilinadi, hech kim ayollarni turmushga chiqishga majburlay olmaydi.