Buxoro hokimi: “Viloyatda 152 ming aholini ish bilan ta’minlaymiz. Odamlar ham boqimandalik kayfiyatidan qutilishi kerak”

Xalq deputatlari Buxoro viloyat Kengashining 44-sessiyasida viloyat hokimi Botir Zaripov aholi bandligi ta’minlash borasida qilinayotgan ishlar xususida to‘xtalib: “Kelgusi 2022-yilda 152 ming aholini ish bilan ta’minlaymiz. Faqat, odamlar ham boqimandalik kayfiyatidan qutilishi kerak”, – dedi. Bu haqda “Daryo” muxbiri xabar bermoqda.

Ta’kidlanishicha, xatlovlar natijasida aniqlangan raqamlarga ko‘ra, jon boshiga daromad miqdori 440 ming so‘mdan past bo‘lgan 61 mingta kam ta’minlangan oilalar hamda jon boshiga daromad miqdori 440 ming so‘mdan yuqori 880 ming so‘mdan past bo‘lgan oilalar bor. Kam ta’minlanganlik ro‘yxatiga tushish ehtimoli yuqori bo‘lgan 26 ming oila bilan manzilli ishlar olib borilgan. Yil yakuni bilan 6,6 trillion so‘mlik investitsiyalar o‘zlashtirilishi va 1229 ta loyihalar ishga tushirilishi hisobiga 12 951 nafar aholining bandligi ta’minlangan.

“Kelgusi yilda ham aholi bandligini ta’minlash orqali ularning daromadlarini oshirish, kambag‘allik darajasini qisqartirish eng asosiy maqsadlarimizdan biri sifatida belgilab olingan. Shundan kelib chiqib, 2022-yilda viloyatda ishsizlik darajasini qisqartirish maqsadida 152 mingdan ortiq ish o‘rinlari yaratilishini rejalashtirganmiz. Biz 2 millionlik aholimiz uchun bor imkoniyat va ishlash sharoitlarini yaratishga harakat qilamiz. O‘z tomorqasida issiqxonachalik, parrandachilik, bog‘dorchilik, pillachilik hamda baliqchilik va umuman xizmat ko‘rsatish sohasini rivojlantirishda hissa qo‘shaman, degan kishini qo‘llab-quvvatlaymiz.

Biroq odamlarimiz ham boqimandalik kayfiyatidan qutilishi kerak. Ko‘pchiligining 20 sotixlab yer maydoni bor, ammo hech ish qilinmagan. Na bir ko‘chat va na bir tok ekilgan. Ajriq, begona o‘t va tikanlar bosib ketgan bo‘m-bo‘sh yerlarni ko‘rib, achinib ketasan, kishi”, – dedi viloyat rahbari.

Botir Zaripovning so‘ziga ko‘ra, kelgusi yildan hosildorligi past bo‘lgan paxta, g‘alla va boshqa ekin maydonlari qisqartirilib, aholiga tanlov asosida 6 ming gektar ekin yer maydonlari ijaraga berilishi ko‘zlangan. Ayni paytda belgilangan yer maydonlarini zaxiraga olish, lotlarga ajratish va tanlovga chiqarish bo‘yicha ishchi guruh tomonidan ishlar olib borilmoqda.