Monopoliyaga qarshi kurashish qo‘mitasi “Raqobat muhitiga salbiy ta’sir ko‘rsatadigan to‘siqlarni bartaraf etish va tadbirkorlik faoliyati yo‘nalishlarini yanada kengaytirish chora-tadbirlari to‘g‘risida”gi prezident qarori loyihasini muhokamaga qo‘ydi.
Qaror loyihasiga ko‘ra, 2022-yil 1-iyuldan boshlab aeroportlar, yo‘l qurilish, elektr va issiqlik energiyasini ishlab chiqarish, issiqlik ta’minoti, neft mahsulotlarini sotish va boshqa sohalardagi korxonalarning davlat ulushlarini bosqichma-bosqich xususiy sektorga sotiladi.
Shuningdek, rangli metallarning parchalari va chiqindilarini sotib olish, qayta ishlash, sotish va tayyorlash faoliyati bilan xususiy sektor shug‘ullanishi mumkinligi belgilanmoqda.
Hujjatga muvofiq 2022-2026-yillarda xususiy sektorni keng jalb qilish hamda eksklyuziv huquqlarni bekor qilish orqali mavjud monopoliyalarni bartaraf etish bo‘yicha chora-tadbirlar rejasi tasdiqlanadi.
Monopoliyaga qarshi kurashish qo‘mitasi ikki oylik muddatda tabiiy monopoliyalar infratuzilmalaridan xususiy sektorni teng-sharoitlarda foydalanishini ta’minlash maqsadida tabiiy monopoliya sohalarini tartibga solish hamda asosiy faoliyat turi tabiiy monopoliya bo‘lmagan subyektlar faoliyatini takomillashtirish bo‘yicha yangi tartib ishlab chiqadi.
Eslatib o‘tamiz, sentabr oyida O‘zbekistonda davlat funksiyalarini xususiy sektorga o‘tkazish tartibi belgilangandi. Unga ko‘ra, Davlat funksiyalari autsorsing, kraudsorsing, davlat ijtimoiy buyurtmasi, akkreditatsiya, sertifikatlashtirish hamda boshqa mexanizmlarni qo‘llagan holda xususiy sektorga o‘tkaziladi.
Izoh (0)