Ijtimoiy tarmoqlarda Qashqadaryo viloyat hokimi o‘rinbosari Rustam Yo‘ldoshev va XTB boshlig‘i To‘lqin Karimov suratga tushish uchun sovg‘a berib, keyin qaytarib olgani aytilgan xabarlar tarqaldi. Viloyat Xalq ta’limi boshqarmasi mazkur holatga munosabat bildirib, sovg‘alar qonuniy tartib asosida maktab balansiga kirim qilinganini ma’lum qildi.
Ijtimoiy tarmoqlarda tarqalgan xabarlarga ko‘ra, Shahrisabz shahridagi Madaniyat saroyida umumta’lim maktablari o‘quvchilari o‘rtasida 5 ta muhim tashabbusni amalga oshirish bo‘yicha Xalq ta’limi vazirligi tomonidan o‘tkazilgan ko‘rik-tanlov, festival va sport musobaqalari g‘olib va sovrindorlarini tantanali taqdirlash tadbiri o‘tkazilgan. Taqdirlashdan so‘ng o‘quvchilardan musiqa asboblari olib qo‘yilib, faqat diplomni o‘zlarida qoldirishgan.
Viloyat XTBning ma’lum qilishicha, tantanali ravishda tadbirda o‘quvchilarga berilgan musiqa jihozlari tegishli nizom talablari asosida topshirilgan.
Qayd etilishicha, tantanali topshirilgan musiqa asboblari o‘rnatilgan qonuniy tartib asosida maktab balansiga kirim qilingan bo‘lib, undan barcha umumta’lim maktab o‘quvchilari foydalanib kelmoqda.
“Anglashimiz lozimki, Qashqadaryo viloyati hokimi o‘rinbosari Rustam Yo‘ldoshev va Xalq ta’limi boshqarma boshlig‘i To‘lqin Karimovlar suratga tushish uchun musiqa asboblari yoki sovg‘alarni berib, so‘ngra uni qaytarib olgan mazmunidagi murojaat haqiqatga yaqin emasligini ma’lum qilamiz”, — deyiladi munosabatda.
Qashqadaryo viloyati Xalq ta’limi boshqarmasi axborot xizmati rahbari Javohir Rustamovning Nasafnews nashriga ma’lum qilishicha, ushbu sovg‘alar shaxsan o‘quvchining qo‘liga topshirilishi kerakligi tanlov nizomida ko‘rsatilmagan.
Avvalroq Qashqadaryoda dars soatlarini sotishga uringan maktab direktori ishi yuzasidan tergovga qadar tekshiruv harakatlari boshlangani, Qashqadaryoda o‘qituvchilarni majburiy mehnatga jalb qilgan direktor ishdan olingani to‘g‘risida xabar berilgandi.
Izoh (0)