Nikoh oqshomi inson hayotidagi muhim kunlardan biri hisoblanadi. Bu unutilmas sanada tarixga muhrlangan suratlar va videotasvirlar yillar davomida kishiga yoqimli xotiralarni yodga solib turadi. “Daryo” o‘zbek shou-biznesidagi ayrim san’atkorlarning to‘yidagi rasmlarini bir sahifaga jamladi.
Rashid Xoliqov
O‘zbekistonda xizmat ko‘rsatgan artist Rashid Xoliqov 18 yoshida “Shahzod” guruhi yigitlari bilan bir to‘yga boradi. U yerda rafiqasi Saidaxonni ko‘rib, yoqtirib qoladi. Ikki yosh bir necha yil yaqin munosabatda bo‘ladi va 1994-yili oila qurishadi. Bugungi kunda ularning uch o‘g‘il va bir qiz farzandi hamda qator nabiralari bor.
Muhammadiso Abdulhairov
Taniqli aktyor Muhammadiso Abdulhairov turmush o‘rtog‘i Xolida Abdulhairovani ilk bor 1987-yilda hozirgi O‘zbekiston davlat san’at va madaniyat institutida uchratadi.
“Institut dekanatiga mo‘ralasam, harf teruvchi qiz mashinkani ayamay ‘savalayapti’. Uni ko‘rganman-u, yuragimda ‘Muhabbat, ey muhabbat’ kuyi yangrab ketgan. Yuragimda nimadir jiz etgani hamon yodimda”, — deydi aktyor bir intervyusida.
Muhammadiso Abdulhairovning onasi 1992-yili ikki o‘g‘lini bir kunda uylab, xonadoniga qo‘shkelin tushiradi. Hozirda ular Aqoiddin Muhammad va Humoyuddin Muhammad ismli o‘g‘illarning ota-onasidir.
Sevara Nazarxon
O‘zbekistonda xizmat ko‘rsatgan artist Sevara Nazarxon 2006-yilning sentabrida Bahrom Primqulovga turmushga chiqqan.
Ularning nikoh oqshomi “O‘zbekiston” mehmonxonasining yozgi restoranida bo‘lib o‘tgan. Juftlikning Dengiz ismli o‘g‘li va Imon Anvar ismli qizi bor.
Samandar Hamroqulov
O‘zbekistonda xizmat ko‘rsatgan artist Samandar Hamroqulov ikki yil davomida o‘ziga munosib jufti halol izlaydi. Ammo unga ma’qul kelgan ikki nafar qiz onasiga yoqmaydi. Shundan so‘ng u bu murakkab ishni volidasiga topshiradi. Onasi topgan namanganlik Dilnozaxon ismli qiz Samandarning ko‘nglini ham jiz ettiradi.
Ularning nikoh to‘yi 2007-yilning 10-avgustida bo‘lgan. Mazkur sana oila uchun juda muhim kun sifatida tarixga muhrlangan. Chunki 10-avgustda Samandar Hamroqulovning otasi Rustam Hamroqulov tavallud topgan.
Halima Ibragimova
Aktrisa va qiziqchi Halima Ibragimova umr yo‘ldoshi Jalol Mirzayevga 28 yoshida turmushga chiqqan. Xo‘jayini undan yetti yosh kichkina.
“Turmush o‘rtog‘im — katta opamning qo‘shnisi. Har zamon to‘y-ma’rakalarga chiqib qarashib yurardi. Singlimning farzandiga o‘g‘il to‘y qilganimizda pochcham bilan to‘yga kelgan. O‘shanda salom-alikdan so‘ng yaqinroq tanishib qolganmiz. Keyinchalik ham bog‘lanib turdik. Qolgani o‘zingizga ma’lum, uch so‘m pul, bir kallaqand deganday, to‘yga ulanib ketdi”, — degan edi aktrisa intervyularining birida. Hozirda bu oilaning bir qiz va bir o‘g‘li bor.
Gulsanam Mamazoitova
O‘zbekiston xalq artisti Gulsanam Mamazoitova 2007-yilning noyabr oyida Sanjarbek ismli sozanda yigit bilan turmush qurgan. Bugungi kunda ular ikki farzandning ota-onasi hisoblanadi.
Jahongir Poziljonov
“Bojalar” guruhi yakkaxoni Jahongir Poziljonov “Boyvachcha” filmini suratga olish jarayonida rafiqasi bilan tanishadi. Bir necha yildan so‘ng, ya’ni 2008-yilda bo‘ydoqlik bilan xayrlashadi. O‘zbek shou-biznesidagi serfarzand otalardan biri bo‘lgan xonandaning besh nafar farzandi: ikki o‘g‘il va uch qizi bor.
Parizoda
“Nihol” mukofoti sovrindori, mahoratli raqqosa Parizodani turmush o‘rtog‘i Sherali Safarov Ozodbek Nazarbekovning konsertida ko‘rib, yoqtirib qoladi. Ularning to‘yi 2010-yilda bo‘lib o‘tadi. Parizoda nikoh oqshomida qo‘shiq kuylab, xo‘jayiniga syurpriz tayyorlaydi. Bu juftlik bugungi kunda ikki qiz va bir o‘g‘ilning ota-onasidir.
Davron Kabulov
“Million” jamoasi sardori va taniqli boshlovchi Davron Kabulovga oila qurgunicha 614 nafar qizning nomzod sifatida surati ko‘rsatilgan, ularning ayrimlari bilan uchrashuvga chiqqan. Vaqt o‘tib, 2016-yilning may oyida E’zozaxon ismli qizga uylangan.
Davron Kabulov “Afruz” guruhi yakkaxoni Jamshid bilan boja bo‘lgan. Juftlikning ikki farzandi bor.
Shahzoda Muhammedova
Dizayner va aktrisa Shahzoda Muhammedova 2018-yilning noyabrida Marat ismli yigitga turmushga chiqqan. Ular ma’lum muddat Moskvada yashagach, Toshkentga qaytib kelgan. Juftlik 2020-yilda qiz farzandli bo‘lgan va unga Milana deb ism qo‘yishgan.
Izoh (0)