Xalqaro Press-klubning navbatdagi sonida Sherzodxon Qudratxo‘ja huquqni muhofaza qilish organlari nufuzi va ularga yaratilgan sharoitlar haqida gapirib, ichki ishlar organlariga kerak bo‘lsa eng so‘nggi rusumdagi mashinalarni olib berish kerakligini aytdi.
Sherzodxon Qudratxo‘ja yaqinda Turkiyada bo‘lgani, u yerda huquqni muhofaza qiluvchi organlar tomonidan foydalaniladigan otlarning chiroyliligi va qanchalik bezatilgani haqida gapirgan.
“Toshkentda ko‘rib qolaman — ko‘chalarimizda, bulvarlarimizda yigitlar, qizlar otda yursa, odamlarda yurtiga, tarixiga hurmat paydo bo‘ladi. Biz Amir Temur avlodlarimiz, Bobur Mirzo avlodlarimiz. Qonimizda qanday sarkardalar qoni bor. Shu odamni hurmat qiladi.
Mana, Dubayda eng oxirgi rusumdagi mashinada yuradi. Chunki jinoyatchiga yetvolishi kerak. Biz jinoyatchiga Lacetti’da yetib ololmaymiz. Kerak bo‘lsa, biz ham o‘nta eng kuchli BMW, o‘nta Mercedes va Ferrari, zo‘rlarini sotib olishishimiz kerak. Chunki ular bilishi kerak — davlat ulardan kuchli. Kerak bo‘lsa, yetvoladi, topadi, to‘rtta yetti nomering bo‘lsa ham, sen bilan gaplashadi”, — deya ta’kidlagan XPK raisi.
Eslatib o‘tamiz, Ichki ishlar vazirligi Yo‘l harakati xavfsizligi bosh boshqarmasi 2020-yilning avgust—oktabr oylarida 28,3 milliard so‘mlik transport vositalarini xarid qilgani to‘g‘risida xabar berilgandi. Ular orasida 15 ta Equinox, 20 ta Cobalt, 13 ta Lacetti 1,5 (L-Comfort Plus), 1 ta Lacetti 1,5 (L-Elegant/AT Plus), 2 ta Volkswagen Caddy , 14 ta avtobus (SAZ HC-40) va 16 ta Malibu-2 rusumli avtotransport vositalari bor edi.
Izoh (0)