Toshkentda 12-oktabrdan ijtimoiy soha obyektlarini isitish boshlanishi, 14-oktabrdan esa ko‘p qavatli turar joy binolari muntazam isitishga o‘tkazilishi to‘g‘risida xabar berilgandi. “Toshissiqquvvati” DUK matbuot kotibining ma’lum qilishicha, poytaxtda issiqlik ta’minoti xizmatlari uchun qayta hisob-kitoblar amalga oshiriladi.
Ma’lum qilinishicha, poytaxtdagi bir qator ko‘p qavatli uylarda isitish tizimidagi kamchiliklar sabab turar joy binolarini qarorda belgilangan muddatdan kechiktirib isitish tizimiga ulash to‘g‘risida Xususiy uy-joy mulkdorlar shirkati vakillari tomonidan dalolatnomalar rasmiylashtirilgan.
Shu bois “Toshissiqquvvati” DUK issiqlik energiyasini o‘z vaqtida yetkazib bermaslik sabablarini aniqlagandan so‘ng, uy-joylarni isitish tizimiga ulash muddatlarini solishtirish, shuningdek, dalolatnomalar to‘g‘ri tuzilganini tekshirish, ularda ko‘rsatilgan manzillar bo‘yicha issiqlik ta’minoti xizmatlari uchun qayta hisob-kitoblar texnik sabablarga ko‘ra 2021-yil dekabr oyida amalga oshirilishini ma’lum qilgan.
Tashkilot yuzaga kelgan noqulayliklar uchun uzr so‘raydi.
Avvalroq nosozlik tufayli Yunusobod tumani to‘liq, Olmazor va Shayxontohur tumanlari esa qisman issiq suv va issiqlik ta’minotidan uzilgani to‘g‘risida xabar berilgandi.
Izoh (0)