O‘zbekiston hukumat qarori bilan “Genom bo‘yicha davlat ro‘yxatiga olish tartibi to‘g‘risida”gi nizom tasdiqlandi, deb xabar bermoqda Telegram’dagi “Huquqiy axborot” kanali.
Nizomga muvofiq, genom bo‘yicha davlat ro‘yxati Ichki ishlar vazirligining Ekspert-kriminalistika bosh markazi tomonidan yuritiladi. Quyidagilar genom bo‘yicha majburiy ro‘yxatga olinadi:
- og‘ir va o‘ta og‘ir jinoyat, jinsiy erkinlikka qarshi jinoyat, 16 yoshga to‘lmaganlar bilan jinsiy aloqa qilish va ularga uyatsiz harakatlar qilish bilan bog‘liq jinoyat sodir qilganlar;
- og‘ir va o‘ta og‘ir jinoyat sodir etishda gumon qilinuvchi yoki ayblanuvchi tariqasida jalb qilinganlar;
- tergovga qadar tekshiruv, surishtiruv va dastlabki tergov jarayonida biologik material olingan aniqlanmagan shaxslar;
- tanib olinmagan murdalar.
Genom bo‘yicha davlat ro‘yxatiga olish — biologik materialdan foydalanish, odamning shaxsini, tanib olinmagan murdani aniqlash uchun genomga oid axborotga ishlov berish bilan bog‘liq faoliyat.
Eslatib o‘tamiz, 2020-yilning 20-noyabr kuni Senatning to‘qqizinchi yalpi majlisida “Genom bo‘yicha davlat ro‘yxatiga olish to‘g‘risida”gi qonuni muhokamasi bo‘lib o‘tgandi. Unda ma’lum qilinishicha, O‘zbekistonda 2020-yilning 9 oyida qariyb 400 nafar bedarak yo‘qolganlar topilmagan, yuzlab noma’lum murdalar shaxsi aniqlanmagan.
Izoh (0)