Palma orolidagi vulqondan otilgan navbatdagi lava oqimi Atlantika okeaniga yetib bordi

Kanar orollari tarkibiga kiruvchi Palma orolidagi Kambre-Vyexa vulqoni otilishidan hosil bo‘lgan yana bir lava oqimi dengizga yetib bordi. Bu haqda “Korrespondent.net” xabar berdi.

Lavaning harorati taxminan 800-900 darajani tashkil qiladi. U dastlab Girresdagi plyajga, u yerdan esa Atlantika okeaniga oqib borgan.

Mahalliy hokimiyat fuqarolarni lava suv bilan aralashganidan so‘ng tarkibida xlorid kislota zarralari bo‘lgan suv bug‘lari hosil bo‘lishi, bu esa inson salomatligi uchun xavfli ekanidan ogohlantirdi.

Ayni damda plyaj atrofidagi barcha uylar evakuatsiya qilingan – lava oqimlarining sekin harakatlanishi sababli xavf yuzaga kelgani uchun so‘nggi bir necha hafta ichida odamlar bu hududdan ko‘chirilgan.

Palma orolidagi Kambre-Vyexa vulqoni bir yarim oydan buyon otilishdan to‘xtamayapti. Palma oroli tanib bo‘lmas darajada o‘zgargan. Oroldagi ko‘chalar, uylar va yo‘llar qalin kul bilan qoplangan.

Palmadagi vulqon otilishi 19-sentabrda boshlangan, o‘n kundan keyin lavaning birinchi oqimi okeanga yetib kelgan. Mutaxassislarning fikricha, vulqon otilishi bir necha oy davom etishi mumkin.