Xitoydagi energetika inqirozi 2022-yilda dunyoda turli tovarlar tanqisligi yuzaga kelishi bilan tahdid qilmoqda, natijada ularning narxi ko‘tarilib ketadi. Bu haqda Britaniyaning The Times gazetasida e’lon qilingan maqolaga tayanib, “Korrespondent.net” xabar berdi.
Nashrning ma’lum qilishicha, Xitoydagi ko‘plab korxonalar so‘nggi ikki haftada faoliyatini to‘xtatishga majbur bo‘lgan. O‘n minglab korxonalar esa haftasiga ikki kunlik ish rejimiga o‘tgan yoki faoliyatini vaqtincha to‘xtatgan.
Bu kabi holat mamlakatda favqulodda darajada ko‘mirning yetishmayotgani sabab yuzaga kelgan, shu munosabat bilan Xitoydagi 34 viloyatning 20 tasini hukumat elektr energiya iste’moliga cheklovlar kiritgan.
Gonkongdagi Robert Walters rekruting kompaniyasi eksperti Jon Myulelining so‘zlariga ko‘ra, hozirda Xitoyda tovarlar ishlab chiqarishga odatdagidan ikki barobar ko‘proq vaqt sarflanmoqda, yaqin kelajakda esa bu mahsulotlarni yetkazib berish zanjiriga ta’sir ko‘rsatadi, bozorda taklifning yetishmasligini yuzaga keltiradi va mahsulotlar narxining oshishiga olib keladi.
O‘z navbatida Gonkongdagi ING banki tahlilchilari Xitoydan mahsulotlarni yetkazib berishdagi uzilishlar 2022-yilning katta qismida ham davom etishi mumkinligini aytmoqda. Bu mahsulotlar narxining global ko‘lamda 10-12 foizga oshishiga olib keladi.
Ta’kidlanishicha, Xitoyda ko‘mir yetishmovchiligiga asosan uning qimmatlashuvi, hukumatning ekologik vaziyatni yaxshilash doirasida zararli chiqindilarni atmosferaga chiqarishni qisqartirish borasidagi qarorlari, shuningdek, import yetkazib berishlardagi uzilishlar sabab bo‘lmoqda.
Izoh (0)