Xavi Ernandes “Barselona” bosh murabbiyi sifatida tanishtirildi. Ispaniyalik mutaxassis ishtirokidagi ilk matbuot anjumani ham bo‘lib o‘tdi.
“Barselona” 41 yoshli mutaxassis bilan 2024-yilgacha mo‘ljallangan shartnoma imzoladi.
Xavi katalon bosh murabbiyi sifatida ilk matbuot anjumanida bir qator savollarga javob qaytardi.
“Barselona” haqidaBiz dunyoning eng zo‘r klubimiz, jamoamiz muvaffaqiyati uchun ishlaymiz. Muxlislarni ko‘rganimdan xursandman. Endi ular oldida mas’uliyatli bo‘lishimiz darkor.
Bu loyiha qachon o‘z mevasini berishi haqida
Biz allaqachon “Espanyol”ga qarshi derbi haqida o‘ylayapmiz. G‘alaba qozonishga tayyorlanishimiz kerak. Undan so‘ng keyingi o‘yin haqida o‘ylaymiz. Muvaffaqiyatga erishish uchun ko‘proq ishlash kerak. Bu uzoq muddatli loyiha.
Pep Gvardiola haqida
Meni Pep bilan solishtirishlari yoqadi. U menga futbolchi va murabbiy sifatida o‘rnak. Menimcha, Gvardiola dunyoning eng yaxshi murabbiyi.
Asosiy g‘oyasi haqida
Futbolchilarni tezroq safga qaytishini kutish lozim. Ular o‘zlarini jamoaning bir qismidek his qilishlari kerak. Bu g‘oyani ularga singdirish kerak.
Yetakchilar haqida
Rahbariyatda va xodimlar orasida ham bo‘lishi kerak. Har kim o‘z vazifasini bajarishi lozim.
Turli xil yetakchilar bor. Futbolchilar yetakchilik qobiliyatlarini oshirishi uchun kerakli ko‘rsatmalarni beramiz. Lionel Messi ajoyib yetakchi, ammo xuddi Inyesta singari u ham tortinchoq edi. Puyol esa kiyim almashtirish xonasida ham, maydonda ham haqiqiy lider edi.
Klub duch keladigan talablar haqida
Mening bitta ustunligim bor — jamoani yaxshi bilaman va bir nechta futbolchi bilan ham tanishman. Tanqidlar, albatta, bo‘ladi. “Barselona” — dunyoning qiyin jamoasi. Bu yerda yaxshi o‘ynash va g‘alaba qozonish darkor. 90 daqiqada 1:0 hisobida g‘olib bo‘lish — qoniqarsiz natija. Klub oldingi muvaffaqiyatga qaytishi uchun harakat qilish lozim. O‘ylaymanki, Zidan va Pep qatoriga qo‘shilaman.
Braziliya terma jamoasidan tushgan taklif haqida
Menda Braziliya terma jamoasidan taklif bor edi. Avvaliga, Titening yordamchisi vazifasida ishlab, Jahon Chempionatidan so‘ng bosh murabbiyga aylanishim kerak edi. Ammo men “Barselona”ga qaytishni ma’qul ko‘rdim.
Xavi, “Barselona” bosh murabbiyiXavini tanishtirish marosimidan lavhalar:
Ma’lumot uchun, Xavi 1998-yildan 2015-yilga qadar “Barselona” sharafini himoya qilgan. Futbolchilik faoliyati davomida katalonlar bilan 25 ta sovrin qo‘lga kiritgan. 2015-yilda Xavi “As-Sadd” jamoasiga borib qo‘shilgan. 2019-yilda futbolchilik faoliyatini yakunladi va Qatar klubida murabbiylik qila boshladi. Xavi “As-Sadd” bilan murabbiy sifatida 7 ta sovrinni qo‘lga kiritdi.
“Barselona” 28-oktabr kuni “Rayo Valyekano”ga 0:1 hisobida mag‘lub bo‘lganidan so‘ng Ronald Kumanni iste’foga chiqargandi. Uning o‘rnini Xavi egalladi.
Izoh (0)