Xitoy Sog‘liqni saqlash davlat qo‘mitasi 2-noyabr kuni mamlakat ichida koronavirusga chalinish bo‘yicha 93 ta holatni qayd etdi, deb xabar beradi “Interfaks”.
Ma’lum qilinishicha, kasallanish holatlarining 35 tasi Xeyxe shahrida (Xeylunszyan provinsiyasining shimoli-sharqiy qismi) qayd etilgan. Xitoy Sog‘liqni saqlash davlat qo‘mitasi ma’lumotlariga ko‘ra, 1-noyabr kuni 54 kishida, 31-oktabrda 59 kishida, 30-oktabrda esa 48 kishida koronavirus tasdiqlangandi.
Xitoyda kasallanish bo‘yicha “ichki” yangi to‘lqin 17-oktabrdan boshlangan, bu vaqt davomida 17 ta provinsiya va tumanlarda 500 dan ortiq kishida COVID-19 aniqlangan, ularning 426 tasi virusning hozirgi to‘lqini manbalariga bog‘liq.
Xitoy OAVlari ushbu tendensiyani “xavotirli” deb atamoqda, chunki kasallanishning yangi holatlari aniqlanayotgan hududlar hukumat tomonidan qattiq choralar ko‘rilayotganiga qaramay, kengayib bormoqda.
OAVlar Pekinda sakkiz kishida koronavirus aniqlanganiga e’tibor qaratgan — bu poytaxtda 2021-yilning 19-yanvaridan buyon qayd etilgan eng yuqori ko‘rsatkich hisoblanadi. Shuningdek, aholiga shahardan tashqariga safarlarni amalga oshirishdan tiyilish, to‘ylarni to‘xtatish, dafn marosimlarini soddalashtirish va muhim bo‘lmagan barcha ommaviy tadbirlarni qisqartirish tavsiya etilmoqda.
Aholining migratsiyasini ham tutib turish bo‘yicha choralar ko‘rilyapti. 3-noyabr kuni Pekindagi “Dasin” aeroportining rejalashtirilgan reyslarini 60 foizdan ortig‘i, “Poytaxt” aeroportining esa qariyb 50 foizi bekor qilingan. 2-noyabr kuni 109 kishida koronavirus aniqlangan bo‘lsa, ularning 16 nafar Xitoyga xorijdan kelganlardir.
Pandemiya boshlanganidan buyon Xitoyda 97 423 kishida koronavirus aniqlangan, 4636 kishi vafot etgan, 91 787 kishi sog‘aygan.
Avvalroq Xitoy AQSh razvedkasining COVID-19 kelib chiqishi haqidagi xulosalarini yolg‘on va ilmiy jihatdan asossiz deb atagani, JSST rahbari koronavirus pandemiyasi ustidan g‘alaba qozonish imkoniyatini baholagani to‘g‘risida xabar berilgandi.
Izoh (0)