Farzandini xususiy bog‘cha va maktablarga berganlarga soliq imtiyozi beriladi — Shavkat Mirziyoyev

O‘zLiDePdan prezidentlikka nomzod Shavkat Mirziyoyev Toshkent shahri aholi bilan uchrashuvda poytaxt maktablaridagi ta’lim sifati va bolalar tarbiyasi masalasiga to‘xtalib o‘tdi , deb xabar beradi “Daryo” muxbiri.

Davlat rahbari ayrim shahar maktablarida bitta sinfda 45-50 tagacha bola o‘qiyotganidan, davlat bog‘chasiga farzandini beraman deb, oylab, hatto yillab navbat kutayotgan oilalar ham borligidan yaxshi xabardor ekanini ma’lum qilgan.

Shu sabab Shavkat Mirziyoyev farzandlarini xususiy bog‘cha va maktabga bergan ota-onalarga yengilliklar berish taklifini bildirgan. Uning so‘zlariga ko‘ra, endi xususiy maktab va bog‘chalar uchun, oylik 3 million so‘mgacha to‘lovdan daromad solig‘i olinmaydi, “bu – har bir farzand to‘lovidan oyiga 400 ming so‘mgacha mablag‘ ro‘zg‘orda qoladi, degani”.

“Qancha qurilish kerak bo‘lsa, qilib beramiz, lekin meni bezovta qilayotgan asosiy masala, bu – poytaxt maktablaridagi ta’lim sifati va bolalarimiz tarbiyasi. Misol uchun, Olmazor, Uchtepa, Shayxontohur, Bektemir tumanlarida oliygohlarga kirish darajasi respublikadagi o‘rtacha ko‘rsatkichdan past. Ayniqsa, Shayxontohurda 5 ta va Olmazorda 4 ta maktab bitiruvchilarining bor-yo‘g‘i 5-6 foizi oliygohlarga kira olgan.

Shu bilan birga, poytaxt maktablarida o‘quvchilarga kasb-hunar berish ishlari hali tizimli yo‘lga qo‘yilgani yo‘q. Bundan tashqari, 23 ming nafar pedagoglarning yarmidan ko‘pi malaka toifasiga ega emas. Poytaxtda ta’lim sifatini yaxshilash maqsadida, Toshkent tajribasi yaratiladi”, — deydi Shavkat Mirziyoyev.

Bunda:

• har bir tumanga xorijdan malakali mutaxassislarni jalb qilib, “Ilg‘or ta’lim” pedagoglarni o‘qitish markazi tashkil qilinadi;
• eng zamonaviy metodikalar va dasturlar asosida, 23 mingdan ziyod pedagoglarning malakasi oshiriladi;
• barcha chet tillari va IT o‘qituvchilari kelgusi uch yilda, xalqaro sertifikatlar oladi.

Shavkat Mirziyoyevning so‘zlariga ko‘ra, o‘quvchilar maktabni kamida bitta kasb-hunarni egallagan holda, tamomlashi shart

“Shu maqsadda, maktablarda o‘quvchilarni kasb-hunarga yo‘naltirishga ko‘maklashadigan alohida lavozim kiritiladi. Ular, kasbga o‘rgatishning yangi tizimi asosida, 9-11 sinf o‘quvchilarini turli korxonalarda 3 oy davomida ish o‘rganishini tashkillashtiradi. Bunda, kasb o‘rganayotgan o‘quvchilarga ish haqi davlat tomonidan to‘lanadi”, — deya taklif bildiradi Prezident.

Avvalroq Shavkat Mirziyoyev Toshkent viloyati uchun malakali pedagog kadrlarni tayyorlash kvotalari ikki barobarga oshirilishini ma’lum qilgandi.

Eslatib o‘tamiz, shu yilning iyulida Shavkat Mirziyoyev oliy ta’lim muassasalarida ta’lim olish imkoniyatlarini kengaytirishga oid qarorni imzolagan. Shuningdek, O‘zbekistonda “temir daftar”dagi oilalarning har bir farzandiga o‘quv qurollari va maktab formasi sotib olish uchun 500 ming so‘mdan berilishi, O‘zbekistonda OTMga kirishda eng yuqori ball to‘plagan 200 nafar abituriyent uchun Prezident granti joriy etilgani hamda O‘zbekistonda ikki va undan ortiq farzandi to‘lov-shartnoma asosida o‘qiyotgan oilalarga imtiyozli ta’lim krediti berilishi haqida xabar berilgandi.