Britaniyalik aktyor va Jeyms Bond haqidagi filmlar yulduzi Deniel Kreyg 6-oktabr kuni Gollivudning Shon-shuhrat xiyobonida o‘z yulduziga ega bo‘ldi. Tantanali marosim videosi Hollywood Walk of Fame rasmiy saytida e’lon qilingan, deb xabar beradi “Korrespondent.net”.
Ta’kidlanishicha, aktyorning yulduzi Los-Anjelesdagi turistlar uchun diqqatga sazovor asosiy maskanning 2704-yulduziga aylangan. Har yili Gollivuddagi ushbu bulvarga o‘n millionga yaqin odam tashrif buyuradi.
“Bu haqda gapiraman deb hech qachon o‘ylamagan edim, ammo Gollivud bo‘ylab ‘ustimdan’ yurib o‘tishlari mening uchun mutlaq sharaf”, — deydi Kreyg marosimda.
Tantanali marosim Jeyms Bond haqidagi “O‘lish vaqti emas” kartinasining Amerikada prokatga chiqishidan bir necha kun oldin bo‘lib o‘tdi. Kreyg “Josus 007” haqidagi filmlarda ijro etgan roli uchun “yulduz”ga ega bo‘lgan to‘rtinchi aktyorga aylandi. Bunga qadar ushbu sharafga Devid Niven, Rojer Mur va Pirs Brosnan loyiq ko‘rilgan.
Avvalroq Jeyms Bondni gavdalantirgan aktyorlar reytingi e’lon qilingandi. Unda birinchi o‘rinni Shon Konneri egallagan. Shuningdek, Deniel Kreyg Jeyms Bond kabi Britaniya harbiy dengiz flotining faxriy ofitseriga aylangan.
Izoh (0)