Ahmad Mas’ud Yevroparlamentda nutq so‘zlashga taklif etildi, ayollar uchun sport taqiqlangach, futbol bo‘yicha qizlar termasi Pokistonga ko‘chib ketdi. Afg‘oniston yangiliklari

Ahmad Mas’ud Yevroparlamentga taklif qilindi

Yevroparlament Afg‘oniston bo‘yicha rezolyutsiya qabul qildi, u Panjsherdagi “Tolibon”ga qarshilik kuchlari yetakchisi Ahmad Mas’udni Yevroparlament va Yevroittifoq Kengashi sessiyalariga taklif qilishni ko‘zda tutadi.

“Kelinglar, afg‘on qarshilik frontining bahodir yetakchisini bundan 20 yil avval afsonaviy otasini taklif qilganimiz kabi Yevropa parlamentiga chaqiramiz. Afg‘oniston uchun yaxshiroq kelajak umidi hali o‘lgani yo‘q”, — dedi Yevroparlamentning Niderlandiyadan deputati Bart Grutxeys.

Panjsher xalq lashkari yetakchisi Yevroparlament taklifini qabul qilish-qilmasligi haqida hozircha ma’lumot yo‘q. Ahmad Mas’udning o‘zi Yevroparlament rezolyutsiyasi yuzasidan hech qanday izoh bermagan.

Futbol bo‘yicha Afg‘oniston ayollar termasi Pokistonga ko‘chib ketdi

Futbol bo‘yicha Afg‘oniston ayollar terma jamoasi Pokistonga jo‘nab ketdi, bu haqda Pokiston axborot vaziri Favad Chaudri ma’lum qilgan.

“Biz Afg‘onistonning ayollar futbol jamoasiga xush kelibsiz deymiz, ular ‘Torxam’ nazorat-o‘tkazish punktiga yetib keldi”, — degan vazir.

Avvalroq “Tolibon” madaniyat komissiyasi rahbari o‘rinbosari Ahmadulla Vosiq Avstraliyaning SBS News telekanaliga bergan intervyusida Afg‘onistonda ayollar, shu jumladan, milliy terma jamoalari sportchilari sport bilan shug‘ullana olmasligini aytgandi. “Islom va Islom amirligi ayollarga ularning yuzi va qomati ko‘rinadigan har qanday sport turi bilan shug‘ullanishni taqiqlaydi”, — degandi Vosiq. Shuningdek, uning qayd etishicha, islom ayollarga faqat zarurat yuzasidan ko‘chaga chiqishga ruxsat beradi, sport esa zarurat hisoblanmaydi.

Vosiqning aytishicha, “Tolibon” bu masalada murosaga bormaydi va bu hatto musobaqalarni tashkillashtirish bilan bog‘liq muammolarni keltirib chiqarsa ham, “islom qadriyatlariga xiyonat qilmaydi”.

“Tolibon” Afg‘onistonda tinchlik vazirligining barcha idoralarini yopdi

“Tolibon” harakati Afg‘oniston Tinchlik vazirligining barcha hududiy idoralarini yopdi. Markaziy idoradagi ish to‘xtatildi, deya ma’lum qildi Bomiyon viloyatidagi muassasa rahbari Najibulla al-Kozay. Tinchlik vazirligi 2020-yilda “Tolibon” bilan yarashuv bo‘yicha muzokaralarni tezlashtirish uchun tuzilgan edi.

Barcha hududiy idoralar yopildi. Viloyatlardagi vazirlik xodimlari Kobulga ketdi, markaziy ofisdagi ish to‘xtatildi”, — dedi Kozay. Uning so‘zlariga ko‘ra, toliblar hokimiyat tepasiga kelganidan buyon qariyb ming kishi maosh olmayapti. Bomiyonda “Tolibon” binoni egallab olgan va barcha uskunalarni musodara qilgan.

Tinchlik vazirligi 2020-yil yanvarida sobiq prezident Ashraf G‘ani farmoni bilan tashkil etilgan edi. Muassasaning hududiy idoralari yettita viloyatda faoliyat olib borgan. Hukumat almashgach, vazirlik toliblar va mahalliy jamoalar oqsoqollari va yetakchilari o‘rtasida uchrashuvlar o‘tkazgan.

“Tolibon” Afg‘oniston Harbiy havo kuchlari sobiq ofitserini qatl qildi

“Tolibon” harakati a’zolari afg‘on harbiylariga amnistiya e’lon qilish haqidagi va’dalariga qaramasdan, Hirot viloyatida Afg‘oniston Harbiy havo kuchlari sobiq ofitseri Zalmay Achakzayni o‘ldirdi.

Shuningdek, ba’zi xabarlarga ko‘ra, Nangarhor viloyatida bir bola va bir ayol toliblar tomonidan o‘ldirilgan, ular jangarilar otishmalari oqibatida halok bo‘lgan.

“Tolibon” hozircha bu ma’lumotni tasdiqlagani yo‘q, ammo ularning ba’zilari aholi tomonidan qo‘lga olinib, mahalliy hukumatga topshirilgan. Nangarhor viloyati gubernatori bola va ayolning o‘limi yuzasidan tekshiruv boshlanganini e’lon qildi.

“Tolibon” sobiq amaldorlarning pul va oltinlarini musodara qilish bo‘yicha reyd o‘tkazdi

Toliblar Afg‘oniston sobiq amaldorlaridan naqd pul va oltin ko‘rinishida 12 million dollardan ortiq mablag‘ni musodara qildi.

Mamlakat Markaziy banki bayonotida aytilishicha, Afg‘oniston jiddiy naqd pul yetishmovchiligiga duch kelgani tufayli afg‘on hukumatining sobiq a’zolariga nisbatan reydlar chog‘ida pul mablag‘lari musodara qilingan.

Pullar Milliy xavfsizlik boshqarmasidagi yuqori mansabli amaldorlardan kelib tushgan. Toliblarning o‘zlari bankka naqd pullarni yetkazayotib, ular har bir sohada shaffoflik tarafdori bo‘lgani uchun mablag‘ni bank g‘aznasiga topshirganini ta’kidlagan.

Ta’kidlanishicha, “Tolibon” istilosidan keyin mamlakat banklari dollar tanqisligini boshdan kechirmoqda va ularning ba’zilari yopilish arafasida turibdi. Qiyinchilikka duch kelgan banklar naqd pul yetishmovchiligi haqida toliblarga ma’lum qilganidan keyin ular sobiq hukumat amaldorlari aktivlarini tekshirishni boshlagan.