Andijonda farzandlikka olish sirini oshkor qilish, ma’muriy nazorat qoidalarini buzish, firibgarlik, talonchilik, o‘g‘rilik kabi jinoyatlarni sodir etish orqali olti marta sudlangan jinoyatchiga qasddan badanga og‘ir shikast yetkazishi ortidan yettinchi marta hukm o‘qildi. Bu haqda “Daryo”ga viloyat sudi axborot xizmati xabar bermoqda.
Ta’kidlanishicha, Mirobid Toshmatov (barcha ism-shariflar o‘zgartirilgan) oilaviy suhbatlashib o‘tirganida turmush o‘rtog‘i Nafisa Toshmatovadan o‘g‘li Izzat olti oydan buyon qo‘shnisi Karina bilan gaplashib yurganini eshitgan. Shuningdek, 2021-yil 2-aprel kuni uyiga qaytayotganda o‘g‘lining qo‘shnisi bilan gaplashib turganiga ham guvoh bo‘lgan. U Karinaga o‘g‘li voyaga yetmaganini, uni tinch qo‘yishini bir necha marotaba aytgan bo‘lsa-da, qo‘shnisi bunga parvo qilmagan. Shu bois u yana Karina bilan tortishib qolib, o‘g‘lini uyiga olib kirgan va farzandini koyigan. Tashqaridan janjalni eshitgan Karina ota-bolaning o‘rtasiga tushgan. Natijada Mirobid ayolning janjalga aralashganini ko‘rib, jahl ustida uning qorin sohasiga qo‘lidagi xo‘jalik pichog‘i bilan urgan. Kutilmagan zarba hamda og‘riqdan o‘zini yo‘qotgan Karina ham javob sifatida Mirobidni yog‘och bo‘lagi bilan urib, unga ham tan jarohati yetkazgan. Voqeaga guvoh bo‘lgan qo‘shnilar jiddiy jarohat olgan Karinaga yordam berish maqsadida shifoxonaga olib borishgan.“Mirobid Toshmatov qo‘shnim bo‘ladi. U va oilasi bilan munosabatlarimiz doim yaxshi bo‘lgan. O‘g‘li Izzat bilan ham do‘stona aloqada bo‘lganmiz. Biroq Mirobid bizni noto‘g‘ri tushungan chog‘i ko‘chada uchrashib qolganimizda bir necha marotaba o‘g‘li yoshligini, shu sababli gaplashmasligimni aytgan. Uning so‘zlaridan hayron qolganman. Vaholanki, o‘g‘li bilan o‘rtamizda hech qanday ishqiy munosabatlar bo‘lmagan. 2-aprel kuni soat 18:00 da Mirobid uyidan farzandi bilan janjallashib chiqdi. Bu vaqtda do‘konga chiqib ketayotgan edim. U meni ko‘rib, oldimga kelib, oilaviy ishlariga aralashmasligimni talab qilib, janjal ko‘tardi va pichoqni qornimga sanchdi. Unga nisbatan hech qanday da’voyim yo‘q. Chora ko‘rish yoki ko‘rmaslik masalasini sudga havola qilaman”, — deydi jabrlanuvchi Karina Sabanyan.
Jinoyat ishlari bo‘yicha Andijon shahar sudi sudyasi Behzod Turdiyev mazkur ishni ko‘rib chiqib, sudlanuvchi Mirobid Toshmatovni Jinoyat kodeksining 104-moddasi 2-qismining “l” bandi (qurolni yoki sovuq qurol sifatida foydalanilishi mumkin bo‘lgan ashyolarni ishlatib badanga o‘rtacha og‘ir shikast yetkazish) bilan aybli deb topib, unga nisbatan 2 yil 6 oy muddatga ozodlikdan mahrum qilish jazosini tayinlagan.
Izoh (0)