Ijtimoiy tarmoqda uchta – Matiz, “VAZ 2107” va Spark avtomobillari to‘qnashuvi va haydovchilar orasidagi mushtlashuv videosi tarqalmoqda. Mazkur holat bo‘yicha YHXBB ma’lumot berdi.
Ma’lum qilinishicha, 2021-yil 2-sentabr kuni soat 11:50 da Bektemir tumani Oltintopgan ko‘chasida Matiz rusumli avtomobil haydovchisi (davlat raqami 01 K 769 KB) B.R. va B.K. boshqaruvidagi “VAZ 2107” rusumli avtomobili (davlat raqami 01 Z 786 OA) uchun avariyaviy holat yuzaga keltirgan.
Oqibatda yuqoridagi avtomobillar va S.X. boshqaruvidagi Spark (davlat raqami 01 V 742 KB) avtomobili to‘qnashuvi yuz bergan. “VAZ 2107” avtomobili to‘xtagach, Matiz va Spark avtomobillari haydovchilari “VAZ 2107” haydovchisiga tan jarohatlari yetkazgan.
Ma’lum bo‘lishicha, kelishmovchilikka 1990-yilda tug‘ilgan B.K. va 1985-yilda tug‘ilgan B.R. orasidagi qarz munosabatlari sabab bo‘lgan.
Holat tafsilotlari Bektemir tumani IIO FMB xodimlari tomonidan o‘rganilmoqda. Tergovoldi tekshiruvi natijasiga ko‘ra qonuniy chora ko‘rilishi aytilgan.
Izoh (0)