Koronavirus pandemiyasi yo‘llardagi vaziyatning keskin o‘zgarishiga olib keldi — cheklovlar va masofadan turib ishlash rejimi sabab odamlar mashinada kamroq harakatlana boshladi. Biroq AQSh Yo‘l harakati xavfsizligi bo‘yicha milliy boshqarmasi (NHTSA) hisobotida ta’kidlanishicha, 2021-yilning birinchi choragida YTH oqibatida yuzaga kelgan o‘lim holatlari ortgan. Hatto so‘nggi 12 yil ichidagi rekordni yangilagan, deb xabar beradi Motor.
2021-yilning dastlabki uch oyi davomida AQShda sodir bo‘lgan YTHlar oqibatida 8730 kishi halok bo‘lgan (2020-yilning birinchi choragida 7900 nafar edi). Shunday qilib, o‘lim holati 10,5 foizga ortgan bo‘lib, bu so‘nggi 12 yil ichidagi eng yuqori ko‘rsatkich hisoblanadi. Shu bilan birga, bosib o‘tilgan masofa 2,1 foizga kamaygan — taxminan 24 milliard kilometr. Solishtirma o‘lim koeffitsiyenti bosib o‘tilgan 100 million milga 1,26 ni tashkil etadi — 2020-yilning birinchi choragida 1,12, 2019-yilda esa 1,05 ni tashkil etgan.
2021-yilning birinchi choragida vafot etganlarning umumiy soni bundan oldingi 12 yilning istalgan choragidagi o‘lim koeffitsiyentidan yuqori. Qayd etilishicha, yo‘llarda o‘lim holatining bu qadar ortishiga haydovchilarning xatti-harakati sabab bo‘lmoqda.
NHTSA’dagilarning ta’kidlashicha, haydovchilar rul boshqaruvida o‘zini ancha xatarli tuta boshlagan. O‘lim bilan yakunlangan yo‘l-transport hodisalarining sodir bo‘lishiga, asosan, tezlikni me’yoridan oshirish, alkogol yoki giyohvandlik vositalari ta’sirida bo‘lish, xavfsizlik kamarlarini taqmaslik va xavfli boshqarish sabab bo‘lgan. “Yo‘llarda insonlarning fojiaviy o‘limiga bog‘liq muammoni birgalikda yondashish orqali yechishimiz kerak. Barcha, jumladan, loyihachi, foydalanishga topshiradigan, quruvchi va yo‘l tizimidan foydalanadiganlar xavfsizlikka javobgardir”, — deydi NHTSA rahbari vazifasini bajaruvchi Stiven Kliff.
Izoh (0)