Olib qo‘yishga shoshilmang. Kuzda kiysa bo‘ladigan yozgi kiyim-kechaklar

Ayollarni kuzda, issiq kunlarga mo‘ljallangan liboslarni nima qilsam ekan degan savol qiynaydi. Aslida esa, hammasi juda oson, yozgi kiyim-kechaklarni ham sentabr havosiga moslab kiysa bo‘ladi. Street style yulduzlarining obrazlari misolida bu haqida ma’lumot berib o‘tamiz.

Kepka

2021-yilda aksariyat ayol va qizlar uchun sevimliga aylanib ulgurgan kepkalar bilan xayrlashishga hojat yo‘q. Aslida kuzga mo‘ljallangan kolleksiyalarda ham ushbu bosh kiyimining chiyduxoba (velvet), kashemir hatto mo‘yna bilan bezalgan variantlarini ham uchratish mumkin.

Shunga qaramay, siz oddiy sport uslubidagi kepkalar bilan ham ko‘ngildagidek obraz yaratishingiz mumkin. Uni shunchaki, to‘g‘ri bichimli shim va top bilan umumlashtirishning o‘zi kifoya. Salqinda sovuq urmasligi uchun esa obrazingizga charm matosidan tikilgan trench qo‘shsangiz bo‘ladi.

To‘qilgan nimcha

Moda ixlosmandlarining deyarli barchasi mazkur yoz faslida to‘qilgan nimchalar bilan obraz yaratishga ulgurdi. Garderobida bu kabi ultrazamonaviykiyimi borlar uchun yaxshi yangilik: kelayotgan mavsumda bu kabi nimchalar o‘z dolzarbligini yo‘qotmaydi.

Faqat farqi shundaki, uni yozdagi singari quruq o‘zini emas, boshqa bir kofta ustidan kiyish kerak. Obrazni o‘ziga xos tufli hamda sumka bilan yakunlasa bo‘ladi.

Lyon matosidan tikilgan shorti

Lyonni nafaqat jazirama, balki salqin havoda ham kiysa bo‘ladi. Sentabrning birinchi yarmida ushbu matodan tikilgan shorti bilan o‘ziga xos obraz yaratishingiz mumkin. Buning uchun bel qismi yuqori turadigan, uzunroq modelni tanlang va uni trikotaj matosidan tikilgan top bilan moslang.

Ustingizdan oversize uslubidagi pidjak kiyishni unutmang. Lofer va rangli paypoq qo‘shish orqali esa boshqalardan ajralib turishingiz aniq.