Sumka garderobdagi eng asosiy elementlardan biri hisoblanadi. Uning yordamida istalgan oddiy obrazni o‘ziga xos ko‘rsatishga erishish mumkin. Buning uchun mazkur aksessuarni did bilan, to‘g‘ri va mavsumga moslab tanlash kerak.
Kerri Bredshou uslubidagi sumkalar o‘z mashhurligini yo‘qotmaganiga qaramay, aksariyat moda ixlosmandlari kuz faslida kichkina va ixcham modellarni qulay variantlarga almashtirishni afzal biladi. Dizaynerlar esa o‘z navbatida mijozlarining qiziqishlarini inobatga olgan holda qulaylikka urg‘u berishda davom etadi. Kuz-qish kolleksiyalarida XXL o‘lchamidagi sumkalarni ko‘plab uchratish mumkin va shundan kelib chiqib aytish mumkinki, katta hajmli modellar kelayotgan mavsumdagi eng qulay trendlardan biri bo‘ladi.
Bunday variantlarni nafaqat sayohatga, balki ofisga ham tutsa bo‘ladi. Ichiga hamma narsani: noutbukdan tortib, bir juft tuflini ham solsa bo‘ladi.
Pandemiya vaqtida ko‘pchilik intiqib kutgan va sentabrdan safarga otlanishga oshiqayotganlar uchun esa bu kabi oversize sumka har tomonlama qo‘l keladi. Tanlov borasida yumshoq matolardan tikilgan, to‘qilgan, trendga xos bezak va zanjirlarni o‘zida mujassam qilgan modellarga e’tibor qaratish tavsiya qilinadi.
Ofis uchun esa charm matosidan tikilgan klassik variantlar afzalroq. Rangi esa qora bo‘lishi shart emas. Masalan, Prada taqdim qilganidek oq, The Row to‘plamidagi singari tepa qismi yig‘iladigan sumkalardan ilhomlansangiz bo‘ladi.
Bunday aksessuarni iloji boricha minimal uslubdagi kostyum-shim yoki sipo bichimdagi ko‘ylak-koftalar bilan moslagan yaxshi.
Izoh (0)