2021-yilning yanvar—iyul oylari davomida Farg‘ona viloyatida velosipedchilar ishtirokida 168 ta YTH sodir bo‘lgan. Bu haqda IIV YHXBB axborot xizmati xabar berdi.
Ma’lum qilinishicha, mazkur yo‘l-transport hodisalari oqibatida 29 nafar fuqaro vafot etgan. Shuningdek, 142 nafar fuqaro turli darajadagi tan jarohatlarini olgan.
Ta’kidlanishicha, velosipedchilar bog‘liq YTHlarning asosiy qismi tungi vaqtlarda sodir bo‘lgan. “Chunki tungi vaqtlarda kerakli nur qaytaruvchi jihozlari mavjud bo‘lmagan velosipedlarni haydovchilar ko‘rmasligi natijasida urib yuborish holatlari kuzatilmoqda”, — deyiladi xabarda.
Ma’lumot uchun, yo‘lda velosiped, aravani boshqarish, miniladigan yoki yuk ortiladigan hayvonlarni haydab o‘tish 14 yoshdan kichik bo‘lmagan shaxslarga ruxsat etiladi. Velosipedlar yo‘lning chetki o‘ng bo‘lagida imkoni boricha o‘ng tomonidan bir qator bo‘lib harakatlanishiga yo‘l qo‘yiladi. Agar piyodalarga xalaqit bermasa, yo‘l yoqasidan harakatlanishga ham ruxsat etiladi.
Velosiped tovushli ishora moslamasi bilan jihozlangan va tormoz tizimi soz bo‘lishi zarur. Qorong‘i vaqtda va yetarlicha ko‘rinmaslik sharoitida harakatlanish uchun velosipedning old tomoniga oq rangli nur qaytargich va chiroq, orqa tomoniga qizil rangli nur qaytargich va chiroq, yon tomonlariga esa, zarg‘aldoq yoki qizil rangli nur qaytargich o‘rnatilishi kerak.
Avvalroq Buxoroda Matiz urib yuborishi oqibatida 58 yoshli velosipedchi vafot etgani, Qashqadaryoda Nexia-3 urib yuborishi oqibatida velosiped mingan bobo va nabira halok bo‘lgani to‘g‘risida xabar berilgandi.
Izoh (0)