Buxoro viloyatining G‘ijduvon tumanida yashovchi 16 yoshli Asadbek Samiyevning ota-onasi o‘g‘li o‘zganing mulkini o‘g‘irlab kelganini ko‘rgach, uni IIBga topshirgan. Olib borilgan tergov-surishtiruv harakatlaridan so‘ng Asadbek Samiyevga nisbatan sud hukmi o‘qilgan. Bu haqda “Daryo”ga Jinoyat ishlari bo‘yicha G‘ijduvon sudi sudyasi Boborahim Ochilov ma’lum qildi.
Sud hujjatlariga ko‘ra, Asadbek Samiyev 2021-yilning 27-mart kuni kechki soat, taxminan, 01:00 da amakisi Sherzod Samiyevga tegishli “Sheyx” kafesi atrofini aylanib, odamlar tarqalishini kuzatgan. Shundan so‘ng o‘zi bilan birga olib kelgan temir jism bilan kafe eshigi qulfini buzgan va u yerga g‘ayriqonuniy ravishda kirgan. Kafening bar qismidan amakisiga tegishli 1 dona bahosi 3 million so‘mlik Aser Packard Bell rusumli noutbukni o‘g‘irlab, uyiga olib borgan.28-mart kuni ertalab Asadbekning onasi Robiya Po‘latova o‘g‘lining o‘g‘rilik sodir qilganini sezgan va bu haqda turmush o‘rtog‘iga bildirgan. 1-guruh nogironi bo‘lgan fuqaro Fayziddin Samiyev o‘g‘lining xatti-harakatidan qattiq g‘azabga tushib, holat haqida zudlik bilan tuman IIBga xabar bergan. Olib borilgan tergov-surishtiruv ishlari davomida voyaga yetmagan o‘smir o‘z aybiga to‘liq iqror bo‘lgan.
Dastlabki tergov surishtiruv ishlari davomidayoq o‘smirning xatti-harakatlari ochiqlangan hamda fuqaro Sherali Samiyevga tegishli noutbuk qaytarilgan. Sud ishi davomida jabrlanuvchi amaki aybdor jiyaniga nisbatan da’vosi yo‘qligini bildirgan.
Asadbek Samiyev Jinoyat kodeksining 169-moddasi 2-qismining “g” bandi (o‘g‘rilik) bilan ayblangan va qilmishidan pushaymonligi, yoshligi, muqaddam sudlanmagani, yetkazilgan zarar bartaraf qilingani inobatga olinib unga bazaviy hisoblash miqdorining 5 baravari, ya’ni 1 million 225 ming so‘m jarima tayinlangan.
Mavzuga doir:
- Namanganda “moyka”dagi karcher apparatini o‘g‘irlagan 27 yoshli fuqaroga jinoyat ishi qo‘zg‘atildi
- Ijtimoiy tarmoqlarda Captiva’da kelgan erkak va ayol do‘konda o‘g‘rilik qilgani aks etgan video tarqaldi. Holat yuzasidan IIBB ma’lumot berdi
- Buxoroda voyaga yetmagan ikki qiz o‘zganing xonadonidan konditsioner o‘g‘irladi
Izoh (0)