IIV YHXBB ijtimoiy tarmoqlarda “Fuqaro va YPX xodimi o‘rtasida janjal” sarlavhasi ostida tarqalgan video yuzasidan ma’lumot berdi.
Ma’lum qilinishicha, 31-iyul kuni Andijon viloyati IIB YHXB YPX xodimi D.Qo‘shboyev tomonidan Andijon viloyati Oltinko‘l tumani “Markaz” MFY Chinobod ko‘chasida Nexia-3 rusumli avtomobil haydovchisi svetoforning taqiqlovchi chirog‘ida harakatlangani bois to‘xtatilgan.
Tekshiruv jarayonida haydovchi T.P.ning me’yoriy hujjatlari yo‘qligi, 2020-yil dekabr oyida mast holda avtomobil boshqargani uchun sud tomonidan ikki yil muddatga avtotransport vositasini boshqarish huquqidan mahrum etilgani ma’lum bo‘lgan.
YPX xodimi o‘rnatilgan tartibda bayonnoma rasmiylashtirib, haydovchi boshqaruvidagi avtomobilni jarima maydoniga joylashtirgan.
“Videoda YPX xodimi va haydovchi o‘rtasidagi nizoli vaziyat aks etgan bo‘lib, holat yuzasidan Andijon viloyati IIB YHXB mas’ullari tomonidan xizmat tekshiruvi o‘tkazilmoqda”, — deyiladi xabarda.
Avvalroq Jizzaxda niqobni to‘liq taqishga majbur bo‘lmagan YPX xodimiga nisbatan xizmat tekshiruvi tayinlangani, Olmaliqda YPX xodimi “25 marta radarga to‘lagan” qoidabuzar ayolni “Abdurazzoq aka”dan bo‘lgan qo‘ng‘iroq sabab qo‘yib yuborgani, Sirdaryoda YPX xodimining “vstrechniy” yurgani tasvirlangan videoni tarqatgan haydovchi qamoqqa olingani to‘g‘risida xabar berilgandi.
Mavzuga doir:
Izoh (0)