“Yordam berish uchun keldim”. Asqar Akayev Qirg‘izistonga qaytishi sababini tushuntirdi

Qirg‘iziston sobiq prezidenti Asqar Akayev jurnalistlar bilan muloqot qilib, Bishkekka qaytib kelishi sabablari haqida gapirib berdi.

“Men respublika rahbariyatidan, Sadir Nurgojoyevichdan vatanimga qaytib kelish imkoniyatini taqdim etgani uchun juda minnatdorman. Men hamkorlik qilish, yordam berish uchun keldim. ‘Qumtor’ loyihasi bo‘yicha menga nisbatan da’volar borligini bilardim. U mening davrimda qurilgan. Men tergovga yordamlashib, ko‘rsatmalarimni berish istagidaman. Qo‘mita (Davlat milliy xavfsizlik qo‘mitasi) raisidan minnatdorman. Juda e’tibor bilan munosabatda bo‘lishdi. Savollar bor, men birinchi so‘roqdan o‘tdim. Men ‘Qumtor’ni qanday qurganimiz, nima uchun qurganimiz, qanday xatoliklar bo‘lgani haqida chin dildan, samimiy gapirib berish uchun keldim”, — dedi Asqar Akayev.

U endigina ish bilan tanishib chiqqanini aytdi. Davlat milliy xavfsizlik qo‘mitasi binosida tergovchilar bilan uchrashuvlar davom etadi.

“Kelganingiz uchun rahmat aytaman, umid qilamanki, salomlashib ko‘rishish uchun kelgansizlar. Men bundan juda xursandman. O‘zimni juda baxtli his qilyapman, chunki 16 yil o‘tib, birinchi marta vatanimga, xalqimning yoniga keldim… Hozir yaxshilanish va gullab-yashnash bo‘yicha jarayonlar ketyapti, men yordam bermoqchiman.

Men bir haftaga uchib keldim. Agar ulgurmasam, savollarga mening advokatim javob beradi. Ha, men qarorgohda bo‘lib, Sadir Japarov bilan uchrashdim, bu yerga kelish imkoniyati uchun unga rahmat aytdim, ‘Qumtor’ni muhokama qildik. Hech qaysi prezidentga nisbatan da’voyim yo‘q, nasib bo‘lsa, masalalarimni hal qilay, shuning uchun buni izohlamayman… Bishkek juda o‘zgarib ketibdi, yaxshi shaharga aylanibdi, bundan keyin ham shunday gullasin. Ko‘kalamzor shahrimiz saqlanib qolibdi”, — dedi Qirg‘iziston sobiq prezidenti.

Avvalroq Qirg‘iziston Davlat milliy xavfsizlik qo‘mitasi Asqar Akayev qo‘mita binosida bo‘lib, uning ishtirokida tug‘ilgan joyi bo‘yicha jinoyat ishi doirasida zarur tergov harakatlari olib borilayotganini ma’lum qilgan edi.

Qirg‘iziston Milliy xavfsizlik davlat qo‘mitasining ta’kidlashicha, Akayev va boshqa sobiq yuqori martabali amaldorlar 1992-yilda “Qumtor” loyihasi bo‘yicha bosh kelishuvni tuzishda, 1994-yilda unga o‘zgartirishlar kiritishda, shuningdek, 2003-yilda “Kameko” kompaniyasi bilan kelishuvni qayta tuzishda korrupsiya holatlari uchun javobgarlikka tortilgan.

Qirg‘izistonning birinchi va ikkinchi prezidentlari Asqar Akayev va Qurmanbek Bakiyevlar iyul oyi boshlarida “Qumtor” ishi bo‘yicha xalqaro qidiruvga berilgandi.

Asqar Akayev 1990-yildan 2005-yilgacha dastlab Qirg‘iziston SSR, so‘ng Qirg‘iziston Respublikasi prezidenti bo‘lgan. 2005-yilda to‘qnashuvlar va prezident qarorgohining qirg‘in qilinishi voqealari hamrohlik qilgan “Lolalar inqilobi” deb nomlangan davrda Qirg‘iziston prezidenti lavozimidan chetlatilgan, so‘ng u Rossiyaga qochib ketgan.