Andijonda internet orqali Suriyadagi terrorchilik tashkiloti yollovchilari bilan aloqada bo‘lib, ularning ta’siri ostida Suriyaga ketishni rejalashtirgan 26 yoshli shaxs ushlandi. Bu haqda DXX matbuot xizmati “Daryo”ga ma’lum qildi.
Ma’lum qilinishicha, I.O ismli mazkur shaxs virtual tarmoqlarda terrorchilarning jihod qilishga undovchi materiallar bilan tanishib, ularni internet tarmoqlarida tarqatib kelgan.
Terrorchilik guruh yollovchilari taklifiga asosan fuqaro I.O. 2021-yilning aprel oyida Turkiya davlatiga chiqib ketgan. Ma’lum muddat terrorchilarning Suriya hududiga o‘tkazish bilan shug‘ullanuvchi mas’ullari nazoratida bo‘lgan va Suriya chegarasiga o‘tish hududida turk harbiylari tomonidan qo‘lga olingan.
Xalqaro hamkorlik aloqalari doirasida I.O. Turkiya huquq-tartibot idoralari tomonidan O‘zbekistonga deportatsiya qilingan. Olib borilgan dastlabki tergovga qadar tekshiruv tadbirlari davomida jinoiy faoliyati o‘z tasdig‘ini topgan va huquqni muhofaza qiluvchi idoralar tomonidan unga nisbatan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari olib borilmoqda.
Avvalroq Qo‘qonda Suriyadagi terrorchilik tashkiloti tarkibiga kirmoqchi bo‘lgan “Jihodchilar” oqimi tarafdorlari faoliyatiga chek qo‘yilgani, Jizzaxda Suriyadagi terrorchilik tashkiloti tarkibiga kirmoqchi bo‘lgan shaxslar ushlangani, Toshkent shahri va Toshkent viloyatida, Andijon shahrida “Jihodchilar” guruhi a’zolari qo‘lga olingani, Farg‘onada esa “Hizb ut-Tahrir” terrorchilik tashkiloti faoliyatiga chek qo‘yilgani to‘g‘risida xabar berilgandi.
Izoh (0)