Jons Hopkins universiteti ma’lumotlariga ko‘ra, dunyoda koronavirusga chalinganlar soni 187 803 426 kishiga yetdi, shularning 4 048 968 nafari vafot etgan. Kasallanganlar soni bo‘yicha AQSh (33,9 million), Hindiston (30,9 million), Braziliya (19,1 million), Fransiya (5,8 million) va Rossiya (5,7 million) eng oldinda bormoqda.

Pekin

Foto: AP Photo

Birinchi marta Hindistonda aniqlangan delta shtammi kamida 111 ta mamlakat va hududlarda qayd etilgan. Jahon sog‘liqni saqlash tashkiloti (JSST) ma’lumotlari shundan darak bermoqda.

Koronavirusning boshqa shtammlari bo‘yicha jahon statistikasi quyidagicha ko‘rinishda: alfa-shtamm (“britancha”) 178 ta; beta variant (“janubiy afrikacha”) — 123 ta; gamma shtammi (“braziliyacha”) esa 75 ta mamlakat va hududlarda aniqlangan.

JSST ma’lum qilishicha, so‘nggi bir hafta ichida (5—11-iyul) dunyoda koronavirusga chalinish bo‘yicha yangi holatlar o‘tgan haftaga nisbatan 10 foizga ko‘payishi kuzatilgan. Haftalik ko‘rsatkich 2 996 465 kishiga yetdi. Butun dunyoda kasallanish darajasi o‘sdi, har kuni o‘rtacha 400 mingdan ortiq ko‘rsatkich qayd etildi (o‘tgan hafta bu ko‘rsatkich 370 mingtaga teng edi). O‘limlar soni 3 foizga oshib, 55 830 tani tashkil qildi.

AQShda so‘nggi uch hafta ichida koronavirus yuqtirish holatlari ikki martadan ko‘proq oshdi.

Rasmiy hisob-kitoblarga ko‘ra, mamlakatda har kuni o‘rtacha 23 ming kishi COVID-19’ga chalinmoqda, uch hafta avval bu ko‘rsatkich kuniga o‘rtacha 11,3 mingdan oshmasdi.

Eng ko‘p kasallanish holatlari aholini emlash jarayoni sekinroq ketayotgan shtatlarda kuzatilmoqda. Bundan tashqari, o‘sishga mamlakatda delta shtammining tarqalishi ham turtki bo‘lmoqda.

Shu bilan birga, kasallanish bo‘yicha umumiy statistika o‘tgan qishdagiga nisbatan ancha past ko‘rsatkichlarni tashkil qilmoqda, o‘shanda kunlik yuqtirish holatlari 240 mingdan oshmasdi.

Moskvada “Sputnik V” vaksinasi 12-17 yoshli o‘smirlarda sinovdan o‘tkazilmoqda. O‘smirlarni koronavirusga qarshi emlash 20-sentabrgacha boshlanishi kerak.

Sinov 5-iyul kuni boshlandi, 100 nafar bola unda ishtirok etmoqda, 6-iyul kuni ularning 21 nafari vaksinaning birinchi dozasini oldi.

Gamaleya nomidagi markaz rahbari Aleksandr Ginsburg bolalarning ikki nafarida 37 daraja tana harorati qayd etilganini va bu normal reaksiya ekanini aytdi. Mutaxassis Rossiyada o‘smirlar uchun vaksinatsiya 20-sentabrga kelib boshlanishini ma’lum qildi.

“Biz bundan muvaffaqiyatli o‘tmoqchimiz, hozircha buning uchun bor imkoniyatimizni ishga solyapmiz. Oxirgi paytlarda kasallikni avvalgidan ko‘ra og‘irroq o‘tkazayotgan o‘smirlar soni oshdi. Ularni himoya qilish kerak”, — deya qo‘shib qo‘ydi Ginsburg.

Niderlandiya bosh vaziri Mark Ryutte mamlakatdagi aksariyat koronavirus cheklovlarining barvaqt bekor qilingani yuzasidan uzr so‘radi.

Siyosatchining bunday bayonot berishiga qirollikda COVID-19 qaytadan avj olgani sabab bo‘ldi. Bor-yo‘g‘i ikki haftada virusga chalinganlar soni to‘qqiz mingga yetdi, bu mamlakatda bir yil ichidagi eng katta ko‘rsatkichdir.

“Biz imkoni bor deb o‘ylagan narsa amalda ilojsiz bo‘lib chiqdi. Biz bemulohaza ish tutdik, bundan afsusdamiz va uzr so‘raymiz”,— dedi siyosatchi.

Aynan ziyofatlar va tungi klublar, hukumatning fikricha, kasallikning avj olishiga sababchi bo‘lgan. Bir kecha-kunduzda Niderlandiyada 8522 kishida koronavirus aniqlangan.

Marokashda COVID-19’ga qarshi ikki dozada emlangan 9 million kishining 0,03 foizigina koronavirusga chalingan.

Xususiy shifokor mutaxassislar milliy kasaba uyushmalari kollegiyasi prezidenti, qirollik Vaksinatsiya ilmiy qo‘mitasi a’zosi Mulay Said Afif ma’lum qilishicha, 9 million kishidan 3400 nafari virusni yuqtirib olgan. Shularning 98 foizi kasallikni yengil shaklda o‘tkazgan. Jiddiy holatlar ulushi minimalga teng”, — dedi u.

“Jiddiy holatlar va o‘limlar statistikasi umid uyg‘otadi. Bu Marokashdagi epidemiologik vaziyat nazorat ostidaligini bildiradi. Shu bilan birga, yangi shtammlarning tarqalishi ham xavotir uyg‘otadi… Vaksinatsiya — pandemiyaga yakun yasashning yagona yo‘li”, — dedi Afif.