Farg‘ona viloyatida qiymati qariyb 10 million so‘m bo‘lgan kuchli ta’sir qiluvchi dori vositalarining noqonuniy aylanmasiga chek qo‘yildi. Bu haqda “Daryo”ga viloyat Bojxona boshqarmasi axborot xizmati ma’lum qildi.
Ma’lum qilinishicha, Farg‘ona viloyat Bojxona boshqarmasi kontrabandaga qarshi kurashish va bojxona auditi bo‘limi xodimlari tomonidan kuchli ta’sir qiluvchi dori vositalarining noqonuniy aylanishiga chek qo‘yishga qaratilgan tezkor tadbir o‘tkazilgan.
Tezkor tadbir davomida Farg‘ona—Qo‘qon yo‘nalishida harakatlanayotgan fuqaro M.Sh. boshqaruvidagi Damas kuzatuvga olinib, Farg‘ona shahri hududida to‘xtatilib, xolislar ishtirokida ko‘zdan kechirilgan.
Tekshiruv davomida transport vositasi salonida xorijda ishlab chiqarilgan va tegishli hujjatlari bo‘lmagan, qiymati 10 million so‘mlik 50 dona “Tropikamid” dorisi topilib, xolislar guvohligida olib qo‘yilgan.
Hozirda mazkur holat yuzasidan bojxona organlari tomonidan surishtiruv harakatlari olib borilmoqda.
Izoh (0)