Yaponiyaning Nintendo kompaniyasiga tegishli Super Mario 64 videoo‘yini bor kartrij Amerikaning Heritage Auctions auksioni orqali rekord darajadagi 1,56 million dollarga sotildi. Bu haqda kimoshdi uyining Twitter’dagi sahifasiga tayanib, Esquire xabar berdi.
Shu orqali o‘yin Nintendo’ning 9-iyul kuni 870 ming dollarga sotilgan The Legend of Zelda kartriji rekordini yangilagan.
Aprel boshida Heritage Auctions orqali 1986-yilgi Super Mario Bros. o‘yinining chop etilmagan kartriji 660 ming dollarga sotilgandi. Associated Press nashrining yozishicha, avvaliga kartrijni Rojdestvoga sovg‘a sifatida xarid qilishgan, biroq u stol g‘aladonida yoddan chiqib qolib ketgan. G‘aladonda 25 yil otgan kartrij o‘zining original qadog‘ini saqlab qolgan. Rojdestvo sovg‘asi 2021-yilning boshida topilgan.
Super Mario Bros. platformeri (ya’ni sakrab turli predmetlarni yig‘ishga asoslangan o‘yin) 1985-yilda Yaponiyaning Nintendo kompaniyasi tomonidan Famicom platformasi uchun yaratilgan. O‘yin tarixda eng ko‘p sotilgan videoo‘yin sifatida Ginnesning rekordlar kitobiga kiritilgan.
Izoh (0)