Singapur dunyodagi eng “kuchli” pasportlardan biriga ega, biroq bu xalqaro safarlar cheklangan bir sharoitda u qadar ahamiyatga ega emas, deb xabar beradi Bloomberg.
Genley Passport Index’ning yangilangan reytingi ma’lumotlariga ko‘ra, nazariy jihatdan Singapur pasporti dunyoning 192 davlati, amaliy jihatdan esa 70 ta mamlakat bo‘ylab erkin harakatlanish imkoniyatini beradi.
Bu boshqa davlatlarga ham tegishli. Buyuk Britaniya yettinchi o‘rinni egallagan, biroq fakt bo‘yicha britaniyaliklar hozirda 187 ta mamlakat o‘rniga 57 tasiga bora oladi — xuddi O‘zbekiston fuqarolari kabi.
AQSh pasporti esa bu borada Ruanda bilan tenglashib qolgan, Yaponiya pasporti esa Qozog‘istonniki bilan:
Henley & Partners rahbari Kristian Kelinning hisoblashicha, xalqaro safarlar kamida 2021-yil oxiriga qadar cheklanadi.
Yangilangan reytingda birinchi o‘rinni Yaponiya egallagan — uning pasporti nazariy jihatdan dunyoning 193 mamlakatiga erkin kirish imkoniyatini taqdim etadi. Ikkinchi o‘rinda Singapur (192), uchinchi o‘rin Germaniya va Janubiy Koreya (191). O‘zbekiston esa Kod-d’Ivuar kabi 91-o‘rinda — 57 mamlakat.
Eslatib o‘tamiz, O‘zbekiston 2020-yilning iyul oyida e’lon qilingan reytingda 86-o‘rinni, yanvar oyidagi reytingda 85-o‘rinni, 2021-yilning yanvarida 86-o‘rinni egallagandi.
Ma’lumot uchun, Henley reytingi harakat erkinligi indekslari asosida tuziladi. Bu ko‘rsatkich har bir davlat fuqarolarining qancha davlatga vizasiz yoki viza olish soddalashtirilgan tartibda borishi mumkinligini ifodalaydi.
Izoh (0)