Buxoro viloyatining Kogon tumanidagi markaziy ko‘chada yo‘l harakati qoidalarini buzib, guruh-guruh bo‘lib harakatlangan kuyovnavkarlar ma’muriy javobgarlikka tortildi. Bu haqda “Daryo”ga viloyat IIB YHXB axborot xizmati rahbari Ulug‘bek Shukrullayev ma’lum qildi.
Ta’kidlanishicha, 2021-yilning 28-iyun kuni Kogon tumanida yashovchi fuqarolar — Sh.T. hamda N.M.ning nikoh to‘yi munosabati bilan kelin-kuyovlarni FHDYo bo‘limiga olib borish uchun oltita avtomobil jalb etilgan. Mazkur kuyovnavkar haydovchilar avtoulovlarida markaziy ko‘chada yo‘l harakati qoidalarini buzib, guruh-guruh bo‘lgan holda harakatlangan.
“Haydovchilar ijtimoiy tarmoqlarda mashhur bo‘lishni istab, yo‘lning qarama-qarshi tomoniga ham chiqib harakatlangan. Shuningdek, avtomobillarga qizil-ko‘k yonuvchi ‘migalka’ maxsus moslamasini o‘rnatib, ovoz kuchaytirgichlar orqali shovqin-suron ko‘targan. Holat Kogon tuman IIB yo‘l harakati xavfsizligi guruhi tomonidan zudlik bilan ro‘yxatga olindi va haydovchilarga chora ko‘rildi”, — deydi Ulug‘bek Shukrullayev.
Qo‘shimcha qilinishicha, davlat raqami 80 D 889 OA hamda 80 V 277 OA bo‘lgan Spark, shuningdek, davlat raqami 80 E 222 AA bo‘lgan Lacetti haydovchilari Ma’muriy javobgarlik to‘g‘risidagi kodeksning 129-moddasi 1-qismi (transport vositalari haydovchilarining yo‘l harakati xavfsizligiga tahdid soluvchi guruh bo‘lib harakat qilishda qatnashishi) hamda 127-modda 2-qismi (transport vositalari haydovchilarining xalaqit berishi yoki avariya holatini yuzaga keltirishi, yo‘lning qarama-qarshi harakatlanish uchun mo‘ljallangan tomoniga yoki bo‘lagiga chiqishi) bilan javobgarlikka tortilgan.
Holat yuzasidan avtoulov egalari yashayotgan manzillarda ham bo‘lib, tushuntirish hamda profilaktik ishlar olib borilgan.
Izoh (0)