Farg‘ona viloyatining Beshariq tumanida 8 yoshli bolani onasiga qaytarishdan bo‘yin tovlagan sobiq er va qaynona uni qarindoshlarining uyiga yashirgani aniqlandi va onasiga qaytarildi. Bu haqda “Daryo”ga MIB matbuot xizmati xabar berdi.
Ma’lum qilinishicha, MIBning Beshariq tuman bo‘limi ish yurituvida fuqarolik ishlari bo‘yicha O‘zbekiston tumanlararo sudining 2021-yil 12-fevraldagi ijro varaqasiga asosan N.H.ga 2013-yilda tug‘ilgan o‘g‘li I.A.ni javobgarlar X.H. va A.H.dan olib berish to‘g‘risidagi ijro hujjati bo‘lgan.
Ijro varaqasi bo‘yicha 15-mart kuni ijro ishi yurituvi qo‘zg‘atilib, ish bo‘yicha qarzdorlar N.H. va A.H. byuroning tuman bo‘limiga chaqirtirilgan. Ularga sud qarori ijrosini ta’minlash majburiy ekanligi hamda bo‘yin tovlangan taqdirda qonun hujjatlarida ma’muriy va jinoiy javobgarlik belgilanganligi haqida tushunchalar berilsa-da, qarzdorlar bolani yashirib, uni onasi N.H.ga berishdan bosh tortgan.
12-may kuni bolaga nisbatan e’lon qilingan qidiruv asosida byuroning Farg‘ona viloyati boshqarmasi qidiruv inspektorlari tomonidan tun-u kun tizimli ish tashkillanib, 23-iyun kuni, ya’ni 40 kun deganda bola otasi A.H.ning yaqin qarindoshlarining uyida aniqlangan va onasi N.H.ga sog‘-omon topshirilgan.
Shu tariqa, qidiruv va ijro hujjati bo‘yicha majburiy ijro harakatlari tamomlanib, ijro hujjati tegishli sudga qaytarilgan.
Avvalroq buxorolik bola otasi tomonidan 4 yoshida Rossiyaga olib ketilib, 7 yoshida majburiy tartibda onasiga qaytarilgani haqida xabar berilgan edi.