“Oxunjon Madaliyevning unvoni almashib qolgan edi”. Qilichbek Tojiyev shogirdining almashib qolgan unvoni haqida (video)

O‘zbekistonda xizmat ko‘rsatgan artist Oxunjon Madaliyev haqida “Daryo” muxbiri Feruz Muhammad xotira ko‘rsatuv tayyorladi.

O‘zbekistonda xizmat ko‘rsatgan artist Qilichbek Tojiyev shogirdi Oxunjon Madaliyevning almashib qolgan unvoni bilan bog‘liq voqea haqida gapirib berdi.

Oxunjon bilan bog‘liq eng esda qolarli vaziyatlardan biri bu — unga 1999-yili O‘zbekistonda xizmat ko‘rsatgan artist unvoni berildi. Unvon sentabrda Mustaqillik kuni e’lon qilinardi va dekabr oyida, ya’ni Konstitutsiya kunida berilardi.  Farg‘onada teatrda taqdimot bo‘lyapti. Ham konsert berishimiz kerak, ham mukofotlanganlarni taqdirlash kerak. Viloyat hokimimiz Alisher Abdujalilovich Otaboyev boshchiligida mukofotlar topshirildi. Oxunjonga navbat keldi: Oxunjon chiqdi, hokimimiz guvohnoma va medalni Oxunjonga topshirdi.

Oxunjon mukofotni olib to‘g‘ri meni yonimga kelib, “Ustoz, bu meniki emas, bu sizniki”, deb mukofotni berdi. “Rahmat” deb xursand bo‘ldim, o‘shanda men hali unvon olmagan edim. Oxunjon olganiga juda xursand bo‘lganman, chunki shogirdim, uning yutug‘i  — mening yutug‘im. “Ustoz, o‘zingiz taqing” dedi Oxunjon. “Men senga taqib qo‘yaman” deb medal qutisini ochsam, ishonasizmi, O‘zbekiston xalq artisti unvoni turibdi. Guvohnomada O‘zbekistonda xizmat ko‘rsatgan artist deb ko‘rsatilgan, lekin medalga adashib “O‘zbekiston xalq artisti” unvonini berib yuborishibdi.

Allohning qudratini qarang. O‘zi unvondan keyin Oxunjon bor-yo‘g‘i 7-8 oy yashadi xolos. Bu holat aslida “Sen shu unvonga loyiqsan” degani edi-da.

Keyin “Oxunjon, sen O‘zbekiston xalq artisti bo‘lding” desam, “Nimaga unaqa deyapsiz?” dedi. Men “Mana, ko‘rgin” desam, hamma hayron qolib, gulduros qarsaklar chalishib, to‘polon bo‘lib ketgan edi.

Qilichbek Tojiyev, O‘zbekistonda xizmat ko‘rsatgan artist, Oxunjon Madaliyevning ustozi

Oxunjon Madaliyev 2000-yil 29-iyun kuni yurak xurujidan vafot etgan.