Toshkentda 18 yoshdan oshganlar koronavirusga qarshi ommaviy emlanadi

Respublika maxsus komissiyasi tomonidan joriy etilgan tartib va cheklovlarga qo‘shimchalar kiritildi.

Unga ko‘ra, 2021-yilning 28-iyunidan xavf osti guruhiga mansub aholi qatlamlari bilan birgalikda Toshkent shahri aholisining 18 yoshdan katta bo‘lgan barcha qatlami o‘zlari biriktirilgan oilaviy poliklinikalarda koronavirus infeksiyasiga qarshi davlat budjeti mablag‘lari hisobidan ixtiyoriy tarzda ommaviy emlanishi belgilandi.

Eslatib o‘tamiz, O‘zbekistonda xavf guruhiga kiruvchi 65 yosh va undan kattalarning 37 foizi koronavirusga qarshi emlangan. Shuningdek:

• tibbiyot xodimlarining — 96 foizi;
• umumta’lim maktabi o‘qituvchilarining — 61,5 foizi;
• maktabgacha ta’lim tashkilotlari xodimlarining — 67 foizi;
• surunkali kasalliklari bor kishilarning — 40 foizi;
• huquqni muhofaza qiluvchi organlar xodimlarining — 60 foizi vaksinatsiyadan o‘tgan.

Eslatib o‘tamiz, aholini koronavirusga qarshi emlash tadbirlari 1-apreldan boshlandi. Emlash ixtiyoriy va bepul, vaksina olishdan bosh tortganlarga hech qanday chora ko‘rilmaydi. Mamlakatda iyun oyi oxirigacha 4 million kishini koronavirusga qarshi emlash rejalashtirilgan. 22-iyundan O‘zbekistonda koronavirusga qarshi emlanuvchilar guruhi yana kengaygan — endi 50 yosh va undan kattalar bepul vaksina olishi mumkin.