Turkiya prezidenti Rajab Erdo‘g‘on Ozarbayjonda Turkiya harbiy bazasi yaratilishi mumkinligini istisno qilmadi. Uning so‘zlariga ko‘ra, ikki davlat o‘rtasida imzolangan Shusha deklaratsiyasi ushbu imkoniyatni to‘smaydi, deb yozadi “RBK”.
Erdo‘g‘on Bokuga tashrifi chog‘ida jurnalistlar bilan suhbatlashdi. Savollardan biri Ozarbayjon jamiyatida Turkiya harbiy bazasiga jiddiy talab borligi haqidagi bayonot bilan boshlandi. “Ushbu yangi shartnoma doirasida harbiy baza tashkil etilishi mumkinmi? Shushada imzolangan deklaratsiya harbiy bazani nazarda tutadimi?”, — deb so‘radi jurnalist.
“Baza yaratish Shusha kelishuvi bandlaridan chetda qolmagan. Ushbu masala yanada rivojlantirilishi mumkin. Hozir asosiy vazifa chegaralarning xavfsizligini ta’minlash. Ozarbayjon prezidenti Ilhom Aliyev va Rossiya prezidenti Vladimir Putin o‘rtasida o‘tkaziladigan, shuningdek, biz o‘tkazayotgan muzokaralar ushbu mavzuni rivojlantirishi mumkin”, — dedi Erdo‘g‘on.
15-iyun kuni Rajab Erdo‘g‘on va Ilhom Aliyev Tog‘li Qorabog‘ning Shusha shahrida o‘zaro ittifoqchilik munosabatlari to‘g‘risidagi deklaratsiyani imzolagan edi. Hujjatda keltirilgan qoidalar qatorida Ozarbayjonning Naxichevan viloyatini mamlakatning qolgan qismi bilan (Armanistonning Syunik viloyati orqali) bog‘lashi kerak bo‘lgan Zangezur yo‘lagining ochilishi ham bor.
Bundan tashqari, Erdo‘g‘on Shushada Turkiyaning bosh konsulligini ochish niyati borligini ma’lum qildi.
Shusha — Tog‘li Qorabog‘dagi eng yirik aholi punktlaridan biri. Uning Ozarbayjon armiyasi tomonidan qaytarib olinishi 2020-yil kuzidagi qurolli to‘qnashuvning muhim voqealardan biri bo‘ldi. 2021-yil may oyida Aliyev rasmiy ravishda Shushani mamlakatning madaniy poytaxti deb e’lon qilgandi.
2020-yilning sentabr oyi oxirida Tog‘li Qorabog‘da Ozarbayjon va Armaniston davlatlari o‘rtasida qurolli nizo kelib chiqqan edi. 2020-yilning 10-noyabrida o‘t ochishni to‘xtatish to‘g‘risidagi uch tomonlama kelishuv imzolanishi bilan nizolar yakuniga yetdi.
Kelishuvga muvofiq Tog‘li Qorabog‘ning muhim qismi Ozarbayjon harbiylari nazorati ostiga o‘tdi va tinchlik shartnomasiga rioya etilishini nazorat qilish Rossiya tinchlikparvar kuchlariga topshirildi. Qo‘shma kuzatuv markazi ishida bir necha o‘nlab turkiyalik harbiylar ham ishtirok etmoqda. Ilhom Aliyev Ozarbayjonga tajovuz qilinsa, Turkiyadan harbiy yordam so‘rashga tayyorligini ma’lum qilgan.
Izoh (0)