O‘zbekistonda ko‘chma go‘zallik salonlarini ishlab chiqarish yo‘lga qo‘yildi

O‘zbekistonda konteynerlar asosida ko‘chma go‘zallik salonlarini ishlab chiqarish yo‘lga qo‘yildi, deb xabar berdi “Podrobno.uz”.

Qayd etilishicha, barcha zarur mebellar bilan jihozlangan 50 ta shunday konteyner chekka qishloqlarga yo‘l oldi. Ishlab chiqaruvchilarning fikriga ko‘ra, har bir salon yetti sartarosh ayolga mo‘ljallangan.

Ushbu ko‘chma go‘zallik salonlarida “ayollar daftari”ga kiritilgan va kasbga o‘qitilgan ayollar ish bilan ta’minlanadi.

Hozirgacha uchta ana shunday konteyner Toshkent viloyati mahallalariga tajriba tariqasida yetkazib berildi.

Loyiha O‘zbekiston kasaba uyushmalari federatsiyasi tomonidan amalga oshirilmoqda.

Avvalroq Buxoro viloyati hokimi Botir Zaripov viloyatda 1088 ta konteynerga talab borligi haqida gapirgan edi.