Namangan viloyati hokimi Shavkat Abdurazzaqov boshchiligidagi delegatsiya Qirg‘izistonning Jalolobod viloyatiga keldi. Bu haqda “Daryo” muxbiri Azizbek Abduvaliyev xabar bermoqda.
Delegatsiya tarkibidan viloyat hokimining o‘rinbosarlari, sektor rahbarlari, tadbirkorlar, san’atkorlar va OAV vakillari, qariyb 50 kishi o‘rin oldi.
Jalolobod shahrida Shavkat Abdurazzaqov Qirg‘iziston hukumatining viloyatdagi vakolatli vakili Abdusattor Sirg‘aboyev bilan muzokaralar o‘tkazdi.
Muzokaralar chog‘ida ikki viloyat o‘rtasida iqtisodiy aloqalarni rivojlantirish, chegara punktlarini ochish, qo‘shma korxonalar tashkil etish va boshqa masalalar ko‘rib chiqildi.
Shundan so‘ng Shavkat Abdurazzaqov Jalolobod faollari, xususan, viloyatda aholining salmoqli qismini tashkil etuvchi o‘zbeklarning vakillari bilan uchrashdi.
Namangan delegatsiyasi Jaloloboddagi Kelechek, Mira, “Dvoynyashki” kabi brendlarga tegishli kompaniyalar va toshni qayta ishlash korxonasi faoliyati bilan tanishdi.
Delegatsiyaning Jalolobod viloyatiga safari davom etmoqda. Bugun ikki viloyat tadbirkorlari ishtirokida biznes-forum va yuzma-yuz muloqotlar o‘tkazilishi rejalashtirilgan.
Ma’lumot uchun, Namangan va Jalolobod viloyatlari birodarlashgan hududlar sanaladi.
Izoh (0)