Albaniya parlamenti 9-iyun kuni konstitutsiyani buzgani uchun mamlakat prezidenti Ilir Metaga impichment e’lon qildi va uni lavozimidan chetlashtirdi, deb yozmoqda Associated Press.
Impichment uchun parlamentning 104 nafar a’zosi ovoz berdi, atigi yetti nafari bunga qarshi chiqdi. Yana uch nafari betaraf qoldi.
Endi uch oy ichida prezidentni lavozimidan ozod etish to‘g‘risidagi qaror Albaniya Konstitutsiyaviy sudi tomonidan tasdiqlanishi kerak.
Parlament o‘tkazgan tergov-surishtiruv natijalariga ko‘ra, Metaning 2021-yil aprel oyida bo‘lib o‘tgan parlament saylovlari kampaniyasida hukmron Sotsialistik partiyaga “noxolisona yondashish” orqali konstitutsiyani buzgani aniqlandi, shundan keyin ovoz berish jarayonlari tashkil etildi.
Aprel oyi oxirida sotsialistlarning bir guruh parlamentchilari mamlakat prezidentiga nisbatan tergov o‘tkazilishini talab qildi, ular ko‘p yillar oldin partiyani tark etgan Metani mamlakatda beqarorlik va zo‘ravonlikni qo‘zg‘atishda, shuningdek, muxolifat bilan bilan til biriktirishda aybladi.
Meta tergov-surishtiruv va impichment jarayonini tanqid qilib, ularni noqonuniy deb atadi.
Albaniyada prezident, asosan, tantanali vazifalarni bajaradi, lekin sud va harbiy sohada ba’zi vakolatlarga ega.
Izoh (0)