Video: Disneylenddagi robotlashtirilgan “O‘rgimchak-odam” parvozi

Kaliforniyadagi Disneylendda robot-kaskadyor birinchi bor ommaga o‘z tryuklarini namoyish etdi, deb xabar beradi Hi-Tech.Mail.ru.

Ko‘ngilochar bog‘da “Qasoskorlar” kinoolami qahramonlariga bag‘ishlangan kampus ochildi. Rasmiy ochilish marosimida tashrif buyuruvchilar “O‘rgimchak-odam”ning chiqishini tomosha qilgan. U bog‘ning ushbu bo‘limidagi asosiy qahramonlardan hisoblanadi.

Havodagi, shuningdek, qotirilgan trosdagi tryuklarni inson emas, balki robotlashtirilgan mexanizm amalga oshiradi. U shouning eng xavfli sahnalarida kostyumdagi aktyorni almashtiradi. Bu kabi chiqishlarni o‘z ko‘zi bilan ko‘rgan tomoshabinlarning aytishicha, harakatlar haqiqatga juda ham yaqinlashtirilgan holda amalga oshirilgan va robotni haqiqiy insondan ajratish qiyin.

Disney kompaniyasi o‘zining kaskadyor-robotini bir necha yil oldin taqdim etgandi. O‘shanda u kostyumsiz va qisman inson kabi ko‘rinishda bo‘lgan.

Stickman robot-akrobatida parvoz vaqtida tana bilan nimani amalga oshirish kerakligi borasida qaror qabul qilishga yordam beradigan datchiklar jamlanmasi bor. Xususan, undagi bir nechta dalnomerlar yordamida balandlik o‘lchanadi, shuningdek, akselerometr va giroskoplar parvoz vaqti keng makonda mo‘ljalni olishga yordam beradi. Olingan ma’lumotlar robotga ideal qo‘nishni amalga oshirishda qanday burilish kerakligi borasida xulosa chiqarishga ko‘maklashadi.

Mazkur texnologiya ko‘ngilochar bog‘lardagi attraksionlar uchun yaratilganiga qaramay, kelajakda robot-kaskadyordan kino sohasidagi xavfli sahnalarni suratga olishda foydalanish rejasi bor.