Farg‘ona viloyatining Toshloq tumanida alimentdan qarzdor otadan 100 million so‘mdan ortiq mablag‘ undirildi. Bu haqda “Daryo”ga MIB viloyat boshqarmasi axborot xizmati xabar berdi.
Ma’lum qilinishicha, Majburiy ijro byurosi Toshloq tuman bo‘limi ish yurituvida fuqarolik ishlari bo‘yicha Marg‘ilon tumanlararo sudi buyrug‘iga asosan, qarzdor Sh.E.dan undiruvchi D.M. foydasiga ikki nafar voyaga yetmagan farzandi uchun aliment undirish haqidagi ijro hujjati mavjud bo‘lgan.
Ijro hujjati bo‘yicha qarzdor Sh.E. ish joyiga ega bo‘lgani va muntazam ravishda aliment uning ish haqidan o‘z vaqtida undirib kelingani sababli undiruvchi D.M. biror marotaba e’tiroz bilan murojaat qilmagan.
“2021-yilning 24-may kuni undiruvchi D.M. byuroning tuman bo‘limiga turmush o‘rtog‘ining ish haqi va boshqa to‘lovlarini qayta hisob-kitob qilish masalasida murojaat qilgan. Mas’ullar tomonidan murojaat o‘rganilganida, qarzdor Sh.E. 2017—2020-yillar va 2021-yilning to‘rt oyi davomida unga hisoblangan ish haqidan tashqari boshqa to‘lovlardan aliment uchun sud buyrug‘ida belgilangan 1/3 qism miqdorida pul mablag‘larini ajratmagani aniqlangan”, — deyiladi boshqarma xabarida.
Qayta hisob-kitob natijasida qarzdor Sh.E. to‘rt yildan ortiq davr mobaynida ish haqidan tashqari daromadlarini yashirgani uchun 106 million 500 ming so‘m aliment qarzi to‘lanmagani ma’lum bo‘lgan.
Majburiy ijro harakatlari davomida qarzdor Sh.E.dan 10 ming dollar miqdoridagi aliment puli naqd shaklda xolislar ishtirokida to‘liq undirilgan.
Mavzuga doir:
- Sirdaryoda qarovsiz va ta’minotsiz qolgan ota ikki o‘g‘lini sudga berdi
- Buxorolik bola otasi tomonidan 4 yoshida Rossiyaga olib ketilib, 7 yoshida majburiy tartibda onasiga qaytarildi
- Qashqadaryoda alimentdan qarzdor ota xorijga chiqish cheklovini bekor qilish uchun xotiniga Lacetti avtomobilini berdi
Izoh (0)