Garet Beyl Yevro—2020 dan keyin futbolchilik faoliyatini yakunlamoqchi

Ispaniyaning “Real Madrid” jamoasi hujumkor yarim himoyachisi Garet Beyl faoliyatini yakunlash istagida, deb xabar qilmoqda Marca.

Xabarga ko‘ra, futbolchi o‘z qarorini Uels bilan Yevro—2020 da ishtirokini yakunlaganidan so‘ng e’lon qiladi.

Beyl “Real” bilan shartnomasini bekor qilmoqchi. 31 yoshli futbolchining madridliklar bilan shartnomasi 2022-yilning yozigacha mo‘ljallangan. Klub ham bunga qarshi emas va shartnomaning bekor qilinishiga rozilik bergan.

Agar Garet faoliyatini yakunlasa, “Real” uelslik futbolchiga to‘lashi kerak bo‘lgan bir yillik maosh, ya’ni 22 million yevroni saqlab qolgan bo‘ladi.

Garet Beyl doimiy tanqidlar va bosimdan charchagani tufayli futbolchilik faoliyatiga yakun yasashni istayapti. Vinger buni oilasi bilan ham muhokama qilgan.

Avvalroq “Real Madrid” o‘z yulduzlarini sotmoqchi ekanligi haqida xabarlar tarqalgandi. Karlo Anchelotti esa Beylning oxirgi vaqtlarda yaxshi o‘yin ko‘rsatayotganini aytib o‘tgandi.

Garet 2020-yilgi yozgi transfer oynasida “Real”dan “Tottenhem”ga ijara asosida o‘tgandi. U Premyer Liga ortda qolgan mavsumidagi 20 ta o‘yinda 11 ta gol va ikkita golli uzatma amalga oshirdi.