Xitoyda dunyoda birinchi bo‘lib insonda H10N3 parranda grippi aniqladi. Bu haqda mamlakat Milliy sog‘liqni saqlash komissiyasiga tayanib “RBK” xabar berdi.
Muassasa ma’lumotlariga ko‘ra, kasallik Szyansu provinsiyasining Chjenszyan shahrida yashovchi 41 yoshli erkakda tasdiqlangan. 23-aprel kuni u isitma va boshqa noma’lum simptomlar bilan kasalxonaga yotqizilgan, 28-may kuni mutaxassislar bemorning tahlillarini o‘rganib, u H10N3 parranda grippi bilan kasallangan degan xulosaga keldi. Erkak kasallikni aynan qanday yuqtirgan bo‘lishi mumkinligi haqida xabar berilmagan.
Komissiya ma’lumotlariga ko‘ra, hozirda erkakning ahvoli barqaror va uni kasalxonadan chiqarish mumkin. U bilan aloqada bo‘lganlar orasida kasallikni yuqtirish holatlari aniqlanmagan. H10N3 — parrandalar orasida tarqaladigan qo‘zg‘atuvchisi sust virus. Komissiyada ta’kidlanganidek, u “odamlarga yuqadigan darajada samaradorlikka ega emas”. Mutaxassislar tirik va shuningdek, kasallikdan nobud bo‘lgan parrandalarga yaqinlashmaslikni tavsiya qiladi.
Milliy sog‘liqni saqlash komissiyasi ma’lumotlariga ko‘ra, ilgari odamlarda H10N3 bilan kasallanish holatlari qayd etilmagan.
Jahon sog‘liqni saqlash tashkiloti (JSST) ma’lumotlariga ko‘ra, avval odamlar parranda grippining A (H5N1), A (H7N9), A (H9N2) subtipidagi viruslarga hamda cho‘chqa grippining A (H1N1), A (H1N2), (H3N2) subtipidagi viruslarga chalingan.
Xitoyda parranda grippining bir nechta turlari mavjud. 2003-yildan beri Osiyodan Yevropa va Afrikaga tarqalib keladigan A (H5N1) virusi ayrim mamlakatlarda parrandalar populyatsiyasiga singib ketgan. Kasallik millionlab parrandalarga yuqqan, yuzlab odamlar ham unga chalingan, ko‘p bemorlar vafot etgan.
Yana bir parranda grippi A (H5) subtipidagi virus ham uy parrandalari va odamlar orasida tarqalgan. 2013-yilda Xitoyda odamlarning A (H7N9) virusiga chalingani haqida xabarlar mavjud.
Fevral oyida Rossiyada odamga yangi turdagi H5N8 parranda grippi yuqishi bilan bog‘liq birinchi holat tasdiqlangan edi. Virus Rossiya janubidagi parranda fabrikasining yetti nafar xodimida qayd etilgan, u yerda 2020-yil dekabrida bir bosh parrandalar orasida parranda grippi avj olgan edi.
Izoh (0)