Toyota kompaniyasi 2021-yil 1-iyundan Land Cruiser Prado 70th Anniversary nomli yangi maxsus versiyasi uchun buyurtmalar qabul qilishni boshladi, deb xabar beradi IXBT.
Bu Land Cruiser avtomobillar oilasining 70 yillik yubileyi munosabati bilan chiqarilgan maxsus seriya hisoblanib, u “Elegans Plyus” va Black Onyx versiyalari o‘rtasidan joy oladi. Avtomobil ishlab chiqaruvchining matbuot xizmati eslashicha, mashhur modelning birinchi prototipi 1951-yilda chiqib, unga qadar hech bir model uddalay olmagan Fudzi tog‘iga ko‘tarilishga muvaffaq bo‘lgan.
Bu kabi yo‘ltanlamas kuzovining orqa ustunlaridagi yubiley logotiplari va salonidagi gilamchalar, shuningdek, eksklyuziv dizaynga ega 19 dyuymli g‘ildiraklari bilan ajralib turadi.
Bundan tashqari, “Elegans” versiyasidan boshlab Toyota Land Cruiser Prado’larga Wi-Fi nuqtasi va Toyota Connected Services funksiyalari o‘rnatilgan bo‘lib, u avtomobillar o‘rtasidagi aloqani ta’minlaydi va MyT dasturi yordamida Android yoki iOS asosdagi smartfonlar orqali boshqarish imkonini beradi.
Shuningdek, yangi funksiyalar qatoridan quyidagi yangiliklar ham o‘rin olgan:
- “Mening avtomobilimni topish” funksiyasi yo‘ltanlamas qayerda turganini xaritada ko‘rsatadi;
- “Marshrutni rejalashtirish” orqali oldindan harakat yo‘nalishini belgilab olish va uni avtomobilning navigatsion tizimiga yuborish;
- “Servis va texnik xizmat ko‘rsatish” avtomobilga xizmat ko‘rsatish tarixini bilish va eng yaqin belgilangan nuqtagacha qancha kilometr qolganini ko‘rish;
- “Harakat tarixi” — kengaytirilgan statistikadan foydalanish, jumladan, masofa uzoqligi, o‘rtacha tezlik, shuningdek, tezlanish va tormozlanish soni;
- Qurilmalar panelidagi indikatorlar barcha nazorat lampalarining vazifasini tushuntirib bera oladi.
Avtomobil ichki SIM-kartaga ega maxsus ma’lumotlarni uzatish moduli bilan jihozlanadi. Mashina egasi bir yil davomida har oy oldindan to‘lab qo‘yiladigan 10 gigabayt trafikdan foydalanishi mumkin. 70th Anniversary maxsus seriyasidagi avtomobil 4 litrli benzin dvigatel bilan jihozlangan bo‘lib, uning narxi 64 ming dollardan boshlanadi. Shuningdek, modelning 2,8 litrli motorga ega dizel versiyasi ham mavjud.
Avvalroq Toyota yangi avlod Tundra pikapining videotizerini namoyish etgani, internetda yangi Toyota Land Cruiser 300’ning ilk videosi paydo bo‘lgani to‘g‘risida xabar berilgandi.
Izoh (0)